ފަތުރުވެރިކަމުގެ ދާއިރާއިން ރާއްޖެއަށް ލިބުނު އެވޯޑުތަކާއެކު ޓޫރިޒަމް މިނިސްޓަރު އިބްރާހިމް ފައިސަލް، ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ތައުރީފް ކުރައްވައިފި އެވެ.
ރޭ ބޭއްވި 31 ވަނަ ވޯލްޑް ޓްރެވެލް އެވޯޑްސްގައި ރާއްޖެއަށް ވަނީ 6 އެވޯޑެއް ލިބިފަ އެވެ. ރާއްޖެއަށް ލިބުނު އެވޯޑުތަކުގެ އެންމެ ފާހަގަކޮށްލެވެނީ ވޯލްޑް ލީޑިން ޑެސްޓިނޭޝަން އެވޯޑާއި ވޯލްޑް ލީޑިން ގްރީން ޑެސްޓިނޭޝަން އެވޯޑެވެ. މިއީ ވޯލްޑް ލީޑިން ޑެސްޓިނޭޝަން އެވޯޑު ރާއްޖެއަށް ޖެހިޖެހިގެން ލިބުނު ފަސްވަނަ ފަހަރުކަންވެސް ފާހަގަކޮށްލެވެ އެވެ.
މި އެވޯޑުތަކާ ރާއްޖޭގެ ފަރާތުން ހަވާލުވެ ވަޑައިގެންނެވީ ޓޫރިޒަމް މިނިސްޓަރު އިބްރާހިމް ފައިސަލް އެވެ.
މި އެވޯޑުތައް ރާއްޖެއަށް ލިބުމުން މިނިސްޓަރު ފައިސަލް އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ މިއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ފަތުރުވެރިކަމާ ބެހޭ ސިނާއަތަށް ގެންގުޅުއްވާ ތަސައްވުރު ދައްކުވައިދޭ ކަމެއް ކަމަށެވެ.
މިއީ ދެމެހެއްޓެނިވި ފަތުރުވެރިކަމުގެ ސިނާއާތެއް ބިނާ ކުރުމަށް ރައީސް މުއިއްޒު ގެންގުޅުއްވާ ސިޔާސަތުތައްވެސް މީގެ ސަބަބުން ދައްކުވައިދޭކަމަށް ފައިސަލް ވިދާޅުވި އެވެ.
މީގެ އިތުރުން ފައިސަލް ވަނީ މިއީ ރައީސް މުއިއްޒުގެ އިރުޝާދުގެ ދަށުން މި ދާއިރާއަށް ހޯދުނު ވަރަށް މުހިންމު އަދި ބޮޑު ކާމިޔާބީއެއްކަމަށް ވިދާޅުވެފަ އެވެ.
ވޯލްޑް ޓްރެވެލް އެވޯޑްސް 2024 ގައި ރާއްޖެއަށް ލިބުނު އިތުރު އެވޯޑުތަކަށް ބަލާއިރު އިންޑިއަން އޯޝަން ލީޑިން ޑެސްޓިނޭޝަން އާއި އިންޑިއަން އޯޝަން ލީޑިން ގްރީން ޑެސްޓިނޭޝަން އާއި އިންޑިއަން އޯޝަން ލީޑިން ޑައިވް ޑެސްޓިނޭޝަންގެ އިތުރުން އިންޑިއަން އޯޝަން ލީޑިން ހަނީމޫން ޑެސްޓިނޭޝަން ހިމެނެ އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވޯލްޑް ޓްރެވެލް އެވޯޑްސް މިނިސްޓްރީ އޮފް ޓޫރިޒަމް ޓުއަރިޒަމް މިނިސްޓަރު އިބްރާހީމް ފައިސަލް
