ދުޅަހެޔޮކަމަކީ ކޮންމެ އިންސާނަކަށް ވެސް މުހިންމު ނިޢުމަތެއް ކަމަށާއި އެކަމަކީ އިންސާނާގެ ރައްކާތެރިކަމާ ގުޅިފައިވާ ކަމެއް ކަމުގައި ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ވިދާޅުވެއްޖެ އެވެ.

މެޑަމް ސާޖިދާ މިހެން ވިދާޅުވީ އިއްޔެ ބޭއްވުނު 2024 ވަނަ އަހަރުގެ ދުނިޔޭގެ ހަކުރުބަލީގެ ދުވަހުގެ ޚާއްޞަ ހަފްލާ ޝަރަފުވެރިކޮށްދެއްވައި ވާހަކަފުޅު ދައްކަވަމުން ނެވެ.

މި ހަފްލާގައި އެ ކަމަނާ ދެއްކެވި ވާހަކަފުޅުގައި، ފަގީރު ޤައުމުތަކުގެ ލިސްޓުން ދިވެހިރާއްޖެ އުނިވެ، ތަރައްގީވަމުންދާ ގައުމުތަކުގެ ލިސްޓުގައި ހިމެނި، ދިވެހީންގެ ޙާލަތަށް އައި ބަދަލާއެކު، ކެއިންބުއިމާއި ދިރިއުޅުމުގެ ވައްޓަފާޅިއާއި ގުޅުންހުރި ބަލިތައް އާންމުވާން ފަށާފައިވާކަން ފފައިވާކަން ފާހަގަކުރެއްވި އެވެ. އެގޮތުން ކުރީން ދިވެހީންގެތެރޭގައި އާންމުވެފައިވާ ގައިންގަޔަށް އަރާ ބަލިތަކުގެ ބަދަލުގައި، ކެއިންބުއިމާއި ދިރިއުޅުމުގެ ވައްޓަފާޅިއާއި ގުޅުންހުރި ކެންސަރާއި، ހަކުރުބައްޔާއި، ހިތުގެ ބަލިތައްފަދަ ގައިންގަޔަށް ނާރާބަލިތައް އާންމުވާން ފަށާފައިވާކަން އެ ކަމަނާގެ ވާހަކަފުޅުގައި ފާހަގަކުރެއްވި އެވެ.

މީގެ އިތުރުން، މެޑަމް ސާޖިދާ ވިދާޅުވީ ހަކުރު ބައްޔަކީ ގައިންގަޔަށް ފެތުރޭ ބައްޔެއް ނޫން ނަމަވެސް އެ ބައްޔަކީ ވާރުތަކުރާ ބައްޔެއް ކަމަށެވެ. އަދި ދިރިއުޅުމުގެ އާދަތައް އިޞްލާޙުކުރުމުން އެ ބަލީގެ ނުރައްކާ ކުޑަކުރެވޭނެ ކަމަށާއި ދިރިއުޅުމާއި ކެއިންބުއިމުގެ އާދަތައް ބެހެއްޓޭ ގޮތުގެ ސަބަބުން ބަލި ޖެހުމާއި ބަލީގެ ގެއްލުން ބޮޑުވުން ބިނާވެފައިވާކަން އެ ކަމަނާގެ ވާހަކަފުޅުގައި ފާހަގަކުރެއްވި އެވެ.

މި ހަފްލާގައި ރައީސުލްޖުމްހޫރިއްޔާގެ އަނބިކަނބަލުން ވަނީ ”ލައިފްސްޓައިލް އިންޓަވެންޝަން ޕްރޮގްރާމް“ އިފްތިތާޙްކޮށްދެއްވާފަ އެވެ. މި ޕްރޮގްރާމުގެ ބޭނުމަކީ ދެމެހެއްޓެނިވި ބަދަލެއް ދިރިއުޅުމުގެ ވައްޓަފާޅިއަށް ގެނެސްގެން ހަކުރުބައްޔާއި ގައިންގަޔަށް ނާރާ ބަލިތައް ޖެހުމުގެ ފުރުސަތު ކުޑަކުރެވޭ މިންވަރު ދެނެގަތުމެވެ. މި ޕްރޮގްރާމުގެ ދަށުން މ. ދިއްގަރުގެ 16 އަހަރުން މަތީގެ އާބާދީއަށް އަމާޒުކޮށް ސްކްރީން ކުރެވި، ހަކުރުބަލި ޖެހުމުގެ ފުރުސަތު ބޮޑު ކަމަށް ލަފާކުރެވޭ އާބާދީއަށް އަމާޒުކޮށް، އެ ފަރާތްތަކުގެ ދިރިއުޅުމުގެ ވައްޓަފާޅިއަށް ގެނެވޭ ބަދަލުގެ ސަބަބުން އެ މީހުންގެ ސިއްޙީ ޙާލަތަށް އަންނަ ބަދަލު ވަޒަންކުރެވޭނެ އެވެ. މި ޕްރޮގްރާމް ހިންގުމަށްޓަކައި ދިއްގަރުން ހޮވާލެވުނު 10 ފަރާތަކަށް ލައިފްސްޓައިލް ކޯޗުންގެ ގޮތުގައި މިހާރު ވަނީ ތަމްރީނު ދެވިފަ އެވެ.

މެޑަމް ސާޖިދާ އިތުރަށް ފާހަގަކުރެއްވި ގޮތުގައި، ފަގީރު ޤައުމުތަކުގެ ލިސްޓުގައި ދިވެހިރާއްޖެ އޮތްއިރު ދިވެހީންނަކީ ހަރަކާތްތެރިކަން ބޮޑު، ކެއުން މަދު އަދި ސިއްޙަތާ ގުޅޭ ކާނާ ކައިބޮއި އުޅުނު ބައެއް ކަމަށާއި، އެހެންނަމަވެސް މިހާރު ދިވެހީންގެ ކެއިންބުއިމަށް ބޭނުންކުރާ ތަކެއްޗާއި އާދަކާދައިގެ އިތުރުން، ތިޔާގިކަމުގެ ސަބަބުން ކެވޭ މިންވަރުވެސް ތަފާތުވެ އަދި ހަރަކާތްތެރިވެ އުޅޭ ނިސްބަތް ވެސް ތަފާތު ވެފައިވާ ކަމަށެވެ. އަދި މިފަދަ ބަދަލުތަކަކީ ހަކުރު ބައްޔަށް މަގުފަހިވާ ކަންކަމުގެ ގޮތުގައި ރައީސުލްޖުމްހޫރިއްޔާގެ އަނބިކަނބަލުން ފާހަގަކުރެއްވި އެވެ.

މިއަހަރުގެ ހަކުރު ބަލީގެ ދުވަހަށް އިންޓަނޭޝަނަލް ޑައިބިޓީސް ފެޑެރޭޝަނުން ކަނޑައަޅުއްވާފައިވާ ޝިޢާރަކީ ”ހަކުރުބައްޔާއި ދުޅަހެޔޮކަން“ އެވެ. މި ޝިޢާރުގެ ދަށުން ނަފްސާނީ، ޖިސްމާނީ އަދި އިޖުތިމާޢީ ދުޅަހެޔޮކަމަށް އިސްކަންދެވޭނެ ކަމަށް މެޑަމް ސާޖިދާ ވިދާޅުވި އެވެ.

ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު މ. ދިއްގަރު