އިޒްރޭލުން ލުބްނާންގައި އެއްގަމު މަގުން އޮޕަރޭޝަނެއް ފަށައިފިކަމަށް އޭއެފްޕީ އިން ރިޕޯޓްކޮށްފި އެވެ.
މި އޮޕަރޭޝަނަކީ ހިޒްބުﷲ އާ ދެކޮޅަށް ކުރިން ފަށާފައިވާ ވައިގެ މަގުން ހިންގާ އަސްކަރީ އޮޕަރޭޝަން ފުޅާކުރުމުގެ ގޮތުން ފަށާފައިވާ އޮޕަރޭޝަނެއްކަމަށް ބެލެވެ އެވެ.
އިޒްރޭލުގެ އަސްކަރިއްޔާއިން ވަނީ ލުބްނާނުގެ އެކި ސަރަހައްދުތަކުގައި ދިރިއުޅޭ ރައްޔިތުންނަށް އެ ސަރަހައްދުތައް ދޫކޮށް ދިއުމަށް އަންގާފަ އެވެ. މީގެ ތެރޭގައި ލުބްނާނުގެ އިރުމަތީ ސަރަހައްދާއި، ބެއިރޫތުގެ ދެކުނު ސަރަހައްދު އަދި ދެކުނުގެ ބެކާ ސަރަހައްދު ހިމެނެ އެވެ. އަދި ދެކުނުގެ ބޯޑަރު ޓައުން ޝެބާގެ ރައްޔިތުންނަށްވެސް އެ ސަރަހައްދު ހުސްކުރުމަށް ގޮވާލާފައިވެ އެވެ.
އައިޑީއެފްގެ އަރަބި މީޑިއާ ޑިވިޝަންގެ ތަރުޖަމާން އަވިޗާއީ އަދްރާއީ ވަނީ ލުބްނާނުގެ އާންމުންނަށް ހިޒްބުﷲ ހަނގުރާމަވެރިން ދިރިއުޅޭ އިމާރާތްތަކާ ވީހާވެސް ދުރުގައި ތިބުމަށް އިންޒާރު ދީފަ އެވެ. މީގެ އިތުރުން، ލުބްނާނުގެ ހެލްތު މިނިސްޓްރީން ވަނީ އިޒްރޭލުގެ ހަމަލާތައް އިތުރުވަމުންދާތީ ދެކުނުގެ ބެއިރޫތުގެ ހޮސްޕިޓަލްތަކުން މީހުން ހުސްކުރުމަށް ރާވާފައިވާކަން އިއުލާންކޮށްފަ އެވެ.
އިޒްރޭލުން ލުބްނާންގައި ހަނގުރާމަ ކުރަން ފެށީ 2006 ވަނަ އަހަރުއެވެ. މިފަހަރުގެ އޮޕަރޭޝަން ފެށިފައިވަނީ ހިޒްބުﷲ އިން ބިނާކުރި އިންފްރާސްޓްރަކްޗަރ ނައްތާލުމުގެ މަޤްޞަދުގައި ކަމަށް އިޒްރޭލުން ބުނެ އެވެ. ހޯމަ ދުވަހުން ފެށިގެން މުޅި ލުބްނާނުގައި 600 އަށްވުރެ ގިނަ މީހުން މަރުވެފައިވާ ކަމަށް ރިޕޯޓްކޮށްފައިވެ އެވެ.
މި އޮޕަރޭޝަނުގެ ސަބަބުން ލުބްނާނުގެ ސަލާމަތާއި ރައްކާތެރިކަމަށް ކުރާނެ އަސަރާ މެދު ބައިނަލްއަޤްވާމީ މުޖުތަމަޢުން ކަންބޮޑުވުން ފާޅުކޮށްފައިވެ އެވެ. އަދި ދެ ފަރާތުން ވެސް ހަނގުރާމަ ހުއްޓާލައި، ޞުލްޙަވެރި ޙައްލަކަށް އަވަސްވުމަށް ގޮވާލާފައިވެއެވެ.
