ރަސްމީ ދަތުރުފުޅެއްގައި ފޮރިން މިނިސްޓަރު ޑރ. އަބްދުﷲ ހަލީލް ވިއެޓްނާމްގެ ވެރިރަށް ހަނޯއީއަށް ވަޑައިގެންފި އެވެ.

މި ދަތުރުފުޅުގެ މައިގަނޑު މަގުސަދަކީ، އދ. ގެ ފަރާތުން ސައިބަރ ކްރައިމްތަކާ ދެކޮޅަށް އެކުލަވާލާފައިވާ އާ ބައިނަލްއަޤުވާމީ އެއްބަސްވުމެއް ކަމަށްވާ ޔުނައިޓެޑް ނޭޝަންސް ކޮންވެންޝަން އެގެއިންސްޓް ސައިބަރކްރައިމްގައި ސޮއިކުރުމުގެ ރަސްމިއްޔާތެއްގައި ބައިވެރިވެވަޑައިގެންނެވުމެވެ.

މިނިސްޓަރު ހަލީލް، އެކްސްގައި ކުރެއްވި ޕޯސްޓެއްގައި ވިދާޅުވީ، ރާއްޖެއިން އިސްކަންދޭ ދާއިރާތަކުން އިތުރަށް ގުޅުން ބަދަހިކުރުމަށްޓަކައި ވިއެޓްނާމްގެ އިސްވެރިންނާ ބައްދަލުކުރައްވައި މަޝްވަރާ ކުރައްވާނެ ކަމަށެވެ. އަދި މި ދަތުރުފުޅުގެ ސަބަބުން ވިއެޓްނާމާއެކު ދެޤައުމު ދެމެދުގައި އުފެދިފައިވާ ޒަމާންވީ ގުޅުން އިތުރަށް ބަދަހިވެ، ކުރިއެރުން ލިބިގެންދާނެ ކަމަށް އުންމީދުކުރައްވާ ކަމަށް ވެސް ހާމަކުރެއްވި އެވެ.

މިނިސްޓަރު ބައިވެރިވެވަޑައިގެންނަވާ އދ. ގެ ކޮންވެންޝަން އަކީ، ކޮމްޕިއުޓަރ ނިޒާމްތަކާއި ޑޭޓާތަކާ ދެކޮޅަށް ނުވަތަ އެތަކެތި ބޭނުންކޮށްގެން ހިންގާ ޖަރީމާތައް (މިސާލަކަށް ހެކިން، އޮންލައިން ފްރޯޑް، އަދި އައިޑެންޓިޓީ ހަރާމްކުރުން) ހުއްޓުވައި، ތަހުގީގުކޮށް، އަދަބު ދިނުމަށް ދުނިޔޭގެ ފެންވަރުގައި މަސައްކަތް ކުރުމަށް އެކުލަވާލާފައިވާ މުހިންމު މުއާހަދާއެކެވެ. މި ކޮންވެންޝަނުން ވަނީ ޤައުމުތަކުގެ ޤާނޫނުތައް އެއްގޮތްކުރުމަށް ހިތްވަރުދީ، ތަހުގީގުކުރާ ފަރާތްތަކުގެ ގުޅުން ބަދަހިކުރުމަށް މަގުފަހިކޮށްފަ އެވެ.

މި އެއްބަސްވުމުގައި ސޮއިކުރުމަށް ހަމަޖެހިފައިވަނީ އޮކްޓޯބަރު 25 އަދި 26 ގައި ވިއެޓްނާމްގެ ހަނޯއީގައި ބާއްވާ ރަސްމިއްޔާތެއްގަ އެވެ. އޭގެ ފަހުގައި 2026 ޑިސެންބަރު 31 ގެ ނިޔަލަށް ނިއު ޔޯކްގައި ހުންނަ އދ. މައިމަރުކަޒުގައި ވެސް ސޮއި ކުރުމުގެ ފުރުސަތު ހުޅުވާލެވިފައިވާނެ އެވެ. ސައިބަރ ސަލާމަތާއި ޒަމާނީ ޖަސްޓިސް ޤާއިމުކުރުމަށް މިފަދަ ބައިނަލްއަޤުވާމީ އެއްބަސްވުމެއް މުހިންމު ދައުރެއް އަދާކުރާކަން ފާހަގަކޮށްލެވެ އެވެ.

ވިއެޓްނާމާއެކު ރާއްޖެއިން ގުޅުން ބަދަހިކުރުމުގެ ގޮތުން މި ދަތުރުފުޅު ވަރަށް މުހިންމުކަން ކަނޑައެޅިގެން ފާހަގަކުރެވެއެވެ. ރާއްޖެ އިން ވިއެޓްނާމާއެކު ހާރިޖީ ގޮތުން ގުޅުން ގުޅުނުތާ 50 އަހަރު ފުރިފައިވަނީ މި އަހަރުގެ ޖޫން މަހުގަ އެވެ.