މިނިސްޓްރީން ގެޒެޓް ކުރި އިޢުލާނުގައި ބަޔާންކޮށްފައިވާ ގޮތުން، މި ސްކޮލަރޝިޕްތަކަށް ހޮވޭ ފަރާތްތަކުގެ ކޯހުގެ އެންމެހައި ޚަރަދުތައް ހަމަޖައްސައިދޭނީ ޖޭޑީއެސްއިންނެވެ. މި ސްކޮލަރޝިޕްތަކަކީ ދެ އަހަރު ދުވަހުގެ މުއްދަތަށް ކުރިއަށްގެންދާ ޕްރޮގްރާމްތަކެކެވެ.

މި ސްކޮލަރޝިޕްތަކަށް ކުރިމަތިލެވޭނީ 2026 އޭޕްރީލް 1 ގެ ކުރިން އުމުރުން 22 އަހަރު ފުރި، 40 އަހަރު ނުވާ ފަރާތްތަކަށެވެ. އަދި ކުރިމަތިލާ ފަރާތްތަކުގައި އެ ދާއިރާއަކުން ބެޗެލަރސް ޑިގްރީއެއް ހާސިލުކޮށްފައިވުމާއެކު، ގުޅުންހުރި ދާއިރާއަކުން މަދުވެގެން ދެ އަހަރު ދުވަހުގެ މަސައްކަތުގެ ތަޖުރިބާ ލިބިފައިވާން ޖެހެއެވެ. މި ފުރުސަތުތަކަށް އެދި ހުށަހެޅުމުގެ ސުންގަޑިއަކީ އަންނަ މަހުގެ 10 ވަނަ ދުވަހުގެ ހަވީރު 4:00 އެވެ.

މިނިސްޓްރީން އިތުރަށް ބުނެފައިވާ ގޮތުގައި، މި ޕްރޮގްރާމްތަކަށް ހޮވޭ ފަރާތްތަކުން، ކޯސް ފެށުމުގެ ކުރިން އެ ޕްރޮގްރާމެއް ހިންގާ މަރުކަޒަކީ މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ) އިން ޤަބޫލުކުރާ މަރުކަޒެއްކަން ކަށަވަރުކުރަން ޖެހޭނެ އެވެ. އަދި ޕްރޮފެޝަނަލް ނުވަތަ ލައިސެންސިންގ ދާއިރާތަކުގެ ޕްރޮގްރާމްތަކަށް ހޮވޭ ފަރާތްތަކުން، އެ ޕްރޮގްރާމަކީ ކަމާބެހޭ އިދާރާއިން ޤަބޫލުކުރާ ޕްރޮގްރާމެއްކަންވެސް ކަށަވަރުކުރަން ޖެހޭނެ އެވެ.

ސްކޮލަރޝިޕާ ގުޅޭ އިތުރު މަޢުލޫމާތު ވެބްސައިޓުން ލިބެން ހުންނާނެ ކަމަށް މިނިސްޓްރީން ބުނެފައިވެއެވެ.

ރާއްޖެ - ޖަޕާން މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް