ދިވެހި ފުލުހުންގެ ހިދުމަތުގެ ގާބިލުކަން އިތުރުކުރުމުގެ ގޮތުން، ޖަޕާނު ސަރުކާރުން ރާއްޖޭގެ ފުލުހުންނަށް ކަނޑު އުޅަނދުތަކެއް ހަދިޔާކޮށްފި އެވެ.
މި އެހީގެ ދަށުން ފަސް ލޯންޗާއި ތިން ރިޖިޑް ހަލްޑް އިންފްލޭޓަބަލް ބޯޓު (އާރުއެޗްއައިބީ) ވަނީ ރަސްމީކޮށް ހަވާލުކޮށްފަ އެވެ.
މި އުޅަނދުތައް ފުލުހުންނާ ހަވާލުކޮށްދެއްވީ ރާއްޖެއަށް ކަނޑައަޅާފައި ހުންނަވާ ޖަޕާނުގެ ސަފީރު އިޝިގާމީ ރޫމިކޯ އެވެ. މި އުޅަނދުތަކާ ފުލުހުންގެ ފަރާތުން ހަވާލުވެވަޑައިގެންނެވީ ހޯމް މިނިސްޓަރު އަލީ އިހުސާން އެވެ.
ޖަޕާން އެމްބަސީން ހާމަކުރި ގޮތުގައި، މި ހިލޭ އެހީ ފޯރުކޮށްދެވުނީ އިގުތިސާދީ އަދި އިޖުތިމާއީ ތަރައްގީގެ ޕްރޮގްރާމުގެ ދަށުންނެވެ. މި އެހީގެ މައިގަނޑު މަގުސަދަކީ ރާއްޖޭގައި މަސައްކަތް ކުރުމުގެ ގާބިލުކަން އިތުރުކުރުމާއި، ކަނޑުގެ ސަލާމަތީ ކަންކަން ވަރުގަދަކުރުމެވެ.
ފުލުހުންނަށް ހަދިޔާކުރި މި އުޅަނދުތަކަކީ 2022 ވަނަ އަހަރުގެ މެއި މަހު ސޮއިކުރި އެކްސްޗޭންޖް އޮފް ނޯޓްސްގެ ދަށުން ކުރިއަށްގެންދާ މަޝްރޫއެއްގެ ބައެކެވެ. އެ މަޝްރޫއުގެ ދަށުން ރާއްޖޭގެ އިގުތިސޯދީ އަދި އިޖުތިމާއީ ތަރައްގީ އިތުރަށް ކުރިއެރުވުމަށް 650 މިލިއަން ޖަޕާނީސް ޔެން (78.6 މިލިއަން ދިވެހި ރުފިޔާ) ހިލޭ އެހީ ފޯރުކޮށް ދިނުމަށް ވަނީ ނިންމާފަ އެވެ. މިއީ ހާއްސަކޮށް ދިވެހި ފުލުހުންގެ ހިދުމަތުގެ މަސައްކަތް ކުރުމުގެ ގާބިލުކަން އިތުރުކުރުމަށް ދެވޭ އެހީއެކެވެ.
ޖަޕާން އެމްބަސީން ބުނެފައިވާ ގޮތުގައި، މި އުޅަނދުތަކުގެ ސަބަބުން ރާއްޖޭގެ ކަނޑުގެ ސަރަހައްދުގައި ހިނގާ ކަނޑުގެ އެކްސިޑެންޓުތަކަށާއި އެހެނިހެން ސަލާމަތީ ކަންކަމަށް އަވަހަށް އަދި ފަސޭހައިން އެޓެންޑުވުމަށް ފުލުހުންނަށް އެހީތެރިވެދޭނެ އެވެ. އަދި މި އުޅަނދުތަކުގެ ސަބަބުން، ފުލުހުންގެ ހިދުމަތުން ރާއްޖޭގެ އެކި ކަންކޮޅުތަކުގައި ދުވަހުން ދުވަހަށް ކުރާ ފުލުހުންގެ މަސައްކަތްތައް ހަރުދަނާވެ، ހެޔޮގޮތުގައި ކުރިއަށްގެންދެވޭނެ ކަމަށް ޖަޕާނު ސަރުކާރުން ދެކެ އެވެ.
ހޯމް މިނިސްޓަރު އަލީ އިހުސާން ރާއްޖެ - ޖަޕާން ދިވެހި ފުލުހުންގެ ޚިދުމަތް ޖަޕާން
