މިޔަންމާއަށް މިއަދު އައި ބާރުގަދަ ބިންހެލުމުގެ ބޮޑު އަސަރެއް ކުރި ތައިލެންޑުގެ ބެންކޮކްގައި ބިމާހަމަވި އިމާރާތުގެ ދަށުވެ މިހާތަނަށް 3 މީހަކު މަރުވެފައިވާކަމަށް އެގައުމުން ހާމަކޮށްފި އެވެ.
އެމެރިކާގެ ޖިއޮލޮޖިކަލް ސާވޭ (ޔޫއެސްޖީއެސް) އިން ބުނީ ފުރަތަމަ ބިންހެލުން އައިސްފައިވަނީ ހުކުރު ދުވަހުގެ މެންދުރު 12:50 ހާއިރު މިޔަންމާގެ ސަގައިން ސިޓީގެ 16 ކިލޯމީޓަރު ހުޅަނގު އުތުރުން 10 ކިލޯމީޓަރު އަޑިން ކަމަށެވެ. އެގޮތުން ފުރަތަމަ ބިންހެލުން ރެކޯޑް ކުރެވިފައިވަނީ 7.7 މެގްނިޓިއުޑްގައި އެވެ. އަދި ދެވަނަ ލޮޅުން އައިސްފައިވަނީ އޭގެ މިނެޓެއް ފަހުން 6.4 މެގްނިޓިއުޑްގައި އެވެ.
އަވަށްޓެރި މިޔަންމާއަށް އައި ބާރުގަދަ ބިންހެލުމުގައި ތައިލެންޑުގެ ވެރިރަށުން މިހާތަނަށް ތިން މީހަކު މަރުވެފައިވާކަން ކަށަވަރުކޮށްދިނީ ތައިލެންޑުގެ ބޮޑުވަޒީރުގެ ނައިބު ފުމްތަމް ވެޗަޔަޗައި އެވެ. އެގޮތުން އޭނާ ވިދާޅުވީ މަރުވި މީހުންގެ އަދަދަކީ މިވަގުތަށް 3 ކަމަށާއި ބެންކޮކުގައި މިއަދު ވެއްޓުނު ދެ އިމާރާތުގެ ދަށުގައި ޖުމުލަ 80 އަށްވުރެ ގިނަ މީހުން ތިބި ކަމަށް މައުލޫމާތު ލިބޭ ކަމަށެވެ.
އެގޮތުން މިވަގުތާއި ހަމައަށް 81 މީހަކު ގެއްލިފައިވާ ކަން ކަށަވަރުވެފައިވާކަމަށްވެސް އޭނާ ވިދާޅުވިއެވެ. އަދި ބެންކޮކުގެ އުސް އިމާރާތްތަކުގެ ތިބި ފަރާތްތައް އެއިމާރާތްތަކުން ފޭބުމަށް އަންގައި އެގައުމުގައި މިހާރު ވަނި ކުއްލި ހާލަތުވެސް އިއުލާނުކޮށްފައި އެވެ.
މިޔަންމާގެ ވެރިކަން ކުރާ އަސްކަރިއްޔާއިން ވަނީ މި ބިންހެލުމާއި އެކު އެގައުމުގެ ހަ ސަރަހައްދަކާއި އެއް ސްޓޭޓެއްގައި ކުއްލި ނުރައްކަލުގެ ހާލަތު އިއުލާނުކޮށްފަ އެވެ. އަދި ދައުލަތުން ވަރަށް އަވަހަށް ހާލަތު އޮޅުން ފިލުވައި، އިންސާނީ އެހީ ފޯރުކޮށްދިނުމާއެކު ރެސްކިއު އޮޕަރޭޝަންތައް ހިންގާނެ ކަމަށްވެސް ވަނީ ބުނެފައި އެވެ.
މިޔަންމާގެ ނޭޕިޑޯގެ ބޮޑު ހޮސްޕިޓަލެއް ”މާސް ކެޝުއަލިޓީ އޭރިއާ“ އެއްގެ ގޮތުގައި ކަނޑައަޅާފައިވާ ކަމަށް އެ ފެސިލިޓީގެ އޮފިޝަލަކު އޭއެފްޕީ ނިއުސް އެޖެންސީއަށް ވިދާޅުވި އެވެ.
