މިޔަންމާއަށް އައި ބިންހެލުމާއި ގުޅިގެން ތައިލޭންޑުގެ ވެރިރަށް، ބެންކޮކުގައި ކުއްލި ނުރައްކަލުގެ ހާލަތު އިއުލާނު ކޮށްފި އެވެ.
ބިންހެލުމުގެ ސަބަބުން މިޔަންމާގެ ބިންގަނޑު ކަނޑައިގެން ގޮސް، ބޮޑެތި ގެއްލުން ލިބިފައިވާއިރު، ތައިލޭންޑުގެ ވެރިރަށް، ބެންކޮކަށް ވެސް ވަނީ އަސަރުކޮށްފައެވެ. އެގޮތުން އިމާރާތްތައް ސުންނާފަތިވެފައިވާއިރު، އެގައުމުގެ އިދާރާތަކުން ކުއްލި ނުރައްކަލުގެ ހާލަތު އިއުލާނު ކޮށްފައިވާ ކަމަށް އެގައުމުގެ ބޮޑުވަޒީރު ވަނީ ހާމަކުރައްވާފައެވެ.
ތައިލޭންޑުގެ ނޭޝަނަލް އިންސްޓިޓިއުޓް އޮފް އެމަޖެންސީ މެޑިސިން އިން ބުނީ، ބިންހެލުމުގައި ސުންނާފަތިވި އިމާރާތަކުން އެކަކު މަރުވެފައިވާ ކަމަށެވެ. އަދި ގިނަ ބަޔަކު އިމާރާތް ދަށުގައި ތާށިވެފައިވާ ކަމަށް ވެސް ވަނީ ބުނެފައެވެ.
މިޔަންމާއަށް މިއަދު ފުލުފުލުގައި ގިނަ ބިންހެލުންތައް އައިސްފައިވާއިރު، ޗައިނާގެ ބިންހެލުންތައް މޮނިޓަރ ކުރާ އިދާރާއަކުން ބުނީ ބިންހެލުން އައިސްފައިވަނީ 7.9 މެގްނިޓިއުޑް ބާރުމިނުގައި ކަމަށެވެ. އިންޑިއާގެ އިދާރާއިން ބުނި ގޮތުގައި ކައިރި ކައިރީގައި މިޔަންމާއަށް 4 ބިންހެލުން ވަނީ އައިސްފައެވެ.
ތައިލޭންޑުގެ އިތުރުން، ޗައިނާގެ ޔުނާން ޕްރޮވިންސަށް ވެސް ބިންހެލުމުގެ އަސަރުކޮށްފައިވާ ކަމަށް ރިޕޯޓްތަކުން ވަނީ ބުނެފައެވެ.
