ކުނި އުކާލުމުގެ މައްސަލައަކީ މުޅި ދުނިޔެއަށް ކުރިމަތިވެފައިވާ ބޮޑު ގޮންޖެހުމެކެވެ. ޚާއްޞަކޮށް ޕްލާސްޓިކް ކުނީގެ ސަބަބުން ތިމާވެށްޓަށް ކުރިމަތިވަމުންދާ ގެއްލުންތައް ދުވަހެއް ދުވަހަކަށް އިތުރުވަމުން އަންނަކަން ފާހަގަކުރެވެ އެވެ. މިފަދަ ނޭދެވޭ އަސަރުތަކުގެ ހިތާމަވެރި މިސާލެއް އަޅުގަނޑުމެންނަށް ފެނިގެން މިދަނީ ބްރެޒިލްގެ މެރިން ބަޔޮލޮޖިސްޓެއް ކަމުގައިވާ ޖެފަސަން ޕިރެސް އާންމުކޮށްފައިވާ ވީޑިއޯއަކުންނެވެ.
އަލްޖަޒީރާއިން ދައްކާފައިވާ މި ވީޑިއޯ ރިޕޯޓުގައި ފެންނަނީ ހެރޮން އާއިލާގެ މާކަނާއެއްގެ ކަރުގައި ތާށިވެފައިވާ ޕްލާސްޓިކް ޖޯޑެކެވެ. މި މަންޒަރަކީ ހަމަ ޔަޤީނުންވެސް ކޮންމެ މީހަކަށްވެސް ހިތްދަތިކަން ގެނުވާނެ މަންޒަރެކެވެ. ޕިރެސް ވިދާޅުވާ ގޮތުގައި މި ޖޯޑު ނެގުމަކީ ވަރަށް މުހިންމު ކަމެކެވެ. އެހެނީ މި ޖޯޑު ނުނެގިއްޖެނަމަ، ދިގު ކަރެއް ލިބިފައިވާ މި މާކަނާއަށް ކާންބޯން ވަރަށް އުނދަގޫވާނެތީ އެވެ. މި ޖޯޑުގެ ސަބަބުން މާކަނާއަށް އެއްޗެހި ކެއުމަށް އުނދަގޫވެ، ކަރުން އެތެރެއަށް އެއްޗެހި ނުދާނެކަމަށް އޭނާ ވިދާޅުވެފައިވެ އެވެ.
މި ނުރައްކާތެރި ހާލަތުން މާކަނާ ސަލާމަތްކުރުމަށްޓަކައި، ޕިރެސް ވަނީ އެ މާކަނާ ހޯދުމަށް މަސައްކަތް ފަށާފަ އެވެ. އަދި މީސްމީޑިއާގައިވެސް އެހީތެރިކަމަށް އެދިފައިވެ އެވެ. މިއީ އަޅުގަނޑުމެން އެންމެން ވިސްނާލަންޖެހޭ ކަމެކެވެ. އެއީ އަޅުގަނޑުމެންގެ އިހުމާލުން ދޫކޮށްލެވޭ ކުޑަކުޑަ ޕްލާސްޓިކް އެއްޗެއްގެ ސަބަބުން ވެސް މިފަދަ ނުރައްކާތެރި ހާދިސާއެއް ހިނގުމަކީ އެކަށީގެންވާ ކަމެއް ކަމަށްވާތީ އެވެ.
ޕިރެސް އިތުރަށް ވިދާޅުވެފައިވާ ގޮތުގައި، އިންސާނުން ބޭނުންކުރާ ޕްލާސްޓިކްގެ ކުދި އާލާތްތައް ދޫނިތަކުން ކެއުމަކީ އާންމު ކަމެކެވެ. ނަމަވެސް ޖޯޑެއްފަދަ ބޮޑު އެއްޗެއް މާކަނާއެއްގެ ކަރުގައި ޖެހުމަކީ ވަރަށް ބިރުވެރި އަދި އަޖައިބުވެރި މަންޒަރެކެވެ. އޭނާ އިންޒާރު ދެއްވާފައިވާ ގޮތުގައި، މި ޖޯޑު ނުނެގިއްޖެނަމަ، މާކަނާ 3-5 ދުވަހުގެ ތެރޭގައި މަރުވެދާނެ އެވެ. މިއީ ވަރަށް ކަންބޮޑުވާންޖެހޭ ކަމެކެވެ.
މި ނުރައްކާތެރި ހާލަތުން މާކަނާ ސަލާމަތްކުރުމަށްޓަކައި، ޕިރެސް ރާވާފައިވަނީ މާކަނާ ނުއުދުހޭ ވަގުތެއްގައި ސާޖަރީއެއް ކޮށްގެން މި ޖޯޑު ނެގުމަށެވެ.
މިއީ މިއަދު މާކަނައަކަށް ދިމާވި ހާދިސާއެއް ނަމަވެސް، މާދަމާ ވެށީގައިވާ އެހެން ދިރުންތަކަށްވެސް މި ނުރައްކަލާ ކުރިމަތިލުމުގެ ބިރު އެބަ އޮތެވެ. ނަތީޖާއަކަށްވާނީ ވެށީގައި ހިމެނޭ ދިރޭ ގިނަ ދިރުންތަކެއް ނެތިދިއުމެވެ. އަހަރެމެން އިންސާނުން ކެއުމަށާއި، އެހެނިހެން ބޭނުންތަކަށް އެ ދިރޭ ދިރުންތައް ހަމަ ކޮންމެ ދުވަހަކުމެ ބޭނުންޖެހޭއިރު، އެ ދިރުންތަކާނުލާ އަޅުގަނޑުމެންގެ ވެށި އޮންނާނެ ގޮތް ހަނދާނަށް ގެންނަވާ އެވެ. އެހެންކަމުން ކޮންމެ މީހަކުވެސް އަމިއްލަ ޒިންމާ އަދާކޮށް، ޕްލާސްޓިކް ބޭނުންކުރުން މަދުކޮށް، ބޭނުންކުރެވޭ ޕްލާސްޓިކް ރަނގަޅަށް ނައްތާލުމަށް ސަމާލުކަން ދޭންޖެހެ އެވެ.
