ޕާކިސްތާނުގެ ކުރީގެ ބޮޑުވަޒީރު ޢިމްރާން ޚާނާއި އޭނާގެ އަނބިކަނބަލުން ބުޝްރާ ބީބީގެ މައްޗަށް ޓެރަރިޒަމްގެ ދަޢުވާ އުފުލައިފިއެވެ.
މިދަޢުވާ އުފުލާފައިވަނީ މިދިޔަ ހަފްތާގައި އިސްލާމާބާދުގައި ބޭއްވުނު މުޒާހަރާތަކާ ގުޅިގެންނެވެ.
ޕާކިސްތާން ސަރުކާރުން މަޢުލޫމާތު ދީފައިވާ ގޮތުގައި، ޢިމްރާން ޚާނާއި ބުޝްރާ ބީބީގެ އިތުރުން ޕާކިސްތާން ތަހްރީކް-އެ-އިންސާފް (ޕީޓީއައި) ޕާޓީގެ ސަތޭކަ އެތައް މަސައްކަތްތެރިންގެ މައްޗަށްވެސް ދަޢުވާ އުފުލާފައިވެ އެވެ. މި ދަޢުވާތަކުގެ ތެރޭގައި ޓެރަރިޒަމްގެ އިތުރުން، ވެރިރަށުގައި މުޒާހަރާކުރުން ހަނިކުރާ ޤާނޫނާ ޚިލާފުވުމާއި، ފުލުހުންނަށް ހަމަލާދިނުމާއި، މީހުން ވަގަށްނެގުމާއި، ސަރުކާރުގެ ކަންކަމަށް ހުރަސްއެޅުން ހިމެނެ އެވެ.
މި މުޒާހަރާތައް ފެށުނީ އާދިއްތަ ދުވަހު އިސްލާމާބާދަށް ގޮސް ޢިމްރާން ޚާންގެ ”އެންމެ ފަހުގެ ގޮވާލުމަށް“ އިޖާބަދީ ސަރުކާރާ ދެކޮޅަށް ސިޓް-އިންގައި ބައިވެރިވުމަށް ދިޔަ ޕީޓީއައި ޕާޓީގެ 1،000 އާ ގާތްކުރާ މަސައްކަތްތެރިންނެވެ. މި މަސައްކަތްތެރިން މިހާރުވެސް ވަނީ ހައްޔަރުކޮށްފަ އެވެ.
ޕީޓީއައިގެ މުއައްސިސް، ޢިމްރާން ޚާން ވަނީ 2023 ވަނަ އަހަރުގެ އޮގަސްޓް މަހުން ފެށިގެން ޖަލުގައެވެ. އަދި އޭނާއާ ދެކޮޅަށް އެތައް ޖިނާއީ މައްސަލަތަކެއް ހުށަހެޅިފައިވެ އެވެ. ބުޝްރާ ބީބީ ވެސް މިއަހަރު 9 މަސްދުވަހު ޖަލުގައި ހޭދަކުރުމަށްފަހު އޮކްޓޯބަރު މަހު ވަނީ ދޫކޮށްލާފަ އެވެ.
މުޒާހަރާގައި އިސްކޮށް ހަރަކާތްތެރިވީ ބުޝްރާ ބީބީ އާއި ޕީޓީއައިގެ ޚައިބަރ ޕަޚްތުންޚްވާ ޕްރޮވިންސްގެ ޗީފް މިނިސްޓަރ ޢަލީ އަމީން ގަންދަޕޫރެވެ. މުޒާހަރާކުރި ފަރާތްތަކުން ޢިމްރާން ޚާން ދޫކޮށްލުމަށް ގޮވާލުމުގެ އިތުރުން އެހެނިހެން ޑިމާންޑްތަކެއްވެސް ކޮށްފައިވެއެވެ.
