އިންޑިއާގެ އުތުރު ސަރަހައްދުގައި ހުންނަ ހޮސްޕިޓަލެއްގައި ހިނގި އަލިފާނުގެ ހާދިސާއެއްގައި އަލަށް އުފަންވި 10 ކުޑަކުދިން މަރުވެ، 17 މީހުންނަށް އަނިޔާވެއްޖެ އެވެ.
މި ހާދިސާ ހިނގާފައިވަނީ ހުކުރު ދުވަހުގެ ރޭ 10:30 ގައި ޖާންސީގައި ހުންނަ މަހަރާނީ ލަކްޝްމީބައި މެޑިކަލް ކޮލެޖްގަ އެވެ.
އުއްތަރް ޕްރަދޭޝްގެ ޑެޕިއުޓީ ޗީފް މިނިސްޓަރ ބްރަޖޭޝް ޕަތަކް ވިދާޅުވި ގޮތުގައި، އެމަޖެންސީ ރެސްޕޮންޑަރުން ވަނީ އަލަށް އުފަންވި 49 ކުދިންގެ ތެރެއިން 38 ކުދިން ސަލާމަތްކޮށްފަ އެވެ. އަދި ހާދިސާގައި އަނިޔާވި 17 މީހުންނަށް މިހާރު އެކި ހޮސްޕިޓަލްތަކުގައާއި ޕްރައިވެޓް ހޮސްޕިޓަލްތަކުގައި ފަރުވާ ދެމުންދާ ކަމަށް ޖާންސީގެ ނޫސްވެރިންނަށް މަޢުލޫމާތު ދެއްވި އެވެ.
ޑެޕިއުޓީ ޗީފް މިނިސްޓަރ އިތުރަށް ވިދާޅުވި ގޮތުގައި، އުފަންވި ކުދިން މަރުވެފައިވަނީ އަނދައިގެންނާއި ނޭވާ ހާސްވުމުގެ ސަބަބުންނެވެ. މަރުވި ކުދިންގެ ތެރެއިން 7 ކުދިން ވަނީ ދެނެގަނެވި ފައެވެ. އަދި ބާކީ ތިބި ކުދިން ދެނެ ދެނެގަތުމުގެ މަރުޙަލާ ކުރިއަށްދާ ކަމަށްވެސް އޭނާ ވިދާޅުވި އެވެ.
ނަން ހާމަކުރަން ބޭނުން ނުވާ ސަރުކާރުގެ އިސް އޮފިޝަލަކާއި ހަވާލާދީ ރޮއިޓާސް އިން ރިޕޯޓްކޮށްފައިވާ ގޮތުގައި އެއް ކުއްޖަކު ވަނީ ގެއްލިފަ އެވެ. އަދިވެސް އެ ކުއްޖާ ފެނިފައިނުވާކަމަށް އޮފިޝަލް ވިދާޅުވި އެވެ.
ޑެޕިއުޓީ ޗީފް މިނިސްޓަރ ޕަތަކް ވިދާޅުވި ގޮތުގައި ފެބްރުއަރީ މަހު ހޮސްޕިޓަލުގެ ސަލާމަތީ އޮޑިޓެއް ހެދުނު ކަމަށާއި، އޭގެ ތިން މަސް ފަހުން އަލިފާނުގެ ޑްރިލްއެއް ކުރެވުނު ކަމަށެވެ. އަދި މި ހާދިސާގައި އެއްވެސް އިހުމާލެއް ފެނިއްޖެނަމަ، ޒިންމާވާންޖެހޭ ފަރާތްތަކާ މެދު ހަރުކަށި ފިޔަވަޅު އެޅޭނެ ކަމަށާއި އަދި އެއްވެސް މީހަކަށް ލުޔެއް ނުދެވޭނެ ކަމަށް އޭނާ ވިދާޅުވި އެވެ.
އިންޑިއަން އެކްސްޕްރެސް ނޫހުން ރިޕޯޓުކޮށްފައިވާ ގޮތުގައި، މޭގްނާ ކަމަށް ބުނެވޭ ނަރުހަކު އަލަށް އުފަންވި ކުދިން ސަލާމަތްކުރަން އުޅުމުގަ އާއި އަލިފާން ނިއްވުމަށް މަސައްކަތްކުރުމުގައި ފައި އަނދާ އަނިޔާ ލިބިފައި ވާކަމަށެވެ.
ސޯޝަލް މީޑިއާގައި ކުރި ޕޯސްޓެއްގައި އިންޑިއާގެ ބޮޑުވަޒީރު ނަރެންދްރަ މޯދީ ވިދާޅުވެފައިވަނީ މި މަރުތަކަކީ ހިތާމަވެރި މަރުތަކެއް ކަމަށެވެ.
”މި ހާދިސާގައި މި މައުސޫމް ދަރިން ގެއްލުނު ފަރާތްތަކަށް އަޅުގަނޑުގެ އެންމެ ފުން ހިތާމަ ފާޅުކުރަން އަދި މި ބޮޑު ގެއްލުން ތަހައްމަލު ކުރުމުގެ ބާރު އެ މައިންބަފައިންނަށް ދެއްވުން އެދި ދުއާ ކުރަން“
އަލިފާން ރޯވި ސަބަބު މިހާރު ދަނީ ތަޙްޤީޤުކުރެވެމުންނެވެ. ނަމަވެސް، ފުލުހުން ބުނާ ގޮތުގައި އެންމެ ބޮޑަށް ގަބޫލުކުރެވެނީ މިކަން ދިމާވެފައިވަނީ އޮކްސިޖަން ކޮންސެންޓްރޭޓަރެއްގެ މައްސަލައެއްގެ ސަބަބުން ކަމަށެވެ.
