ގާއްޒާގެ އެކި ސަރަހައްދުތަކަށް އިސްރާއީލުން ދިން ވައިގެ ހަމަލާތަކުގައި މަދުވެގެން 95 ފަލަސްތީނުން ޝަހީދުވެއްޖެ ކަމަށް ގާއްޒާގެ ސިއްހީ އިދާރާތަކުން ހުކުރު ދުވަހު ހާމަކޮށްފި އެވެ.
މި ހަމަލާތައް ގިނައިން އަމާޒުވެފައިވަނީ ގާއްޒާގެ އުތުރު ސަރަހައްދަށެވެ. އެ ސަރަހައްދުގެ ހޮސްޕިޓަލަކަށް ހަމަލާދީ، މެޑިކަލް ސަޕްލައިތައް އަންދާލައި، އޮޕަރޭޝަންތަކަށް ހުރަސްއަޅާފައިވާ ކަމަށް މަޢުލޫމާތު ލިބިފައިވެ އެވެ.
ބުރާސްފަތި ދުވަހުގެ ހަމަލާތަކުގައި ޝަހީދުވެފައިވާ މީހުންގެ ތެރެއިން ގިނައީ އުތުރު ގާއްޒާގެ އާންމު ރައްޔިތުން ކަމަށް ސިއްހީ އިދާރާތަކުން އަލްޖަޒީރާއަށް މަޢުލޫމާތު ދީފައިވެ އެވެ.
ބުރާސްފަތި ރޭ ފެށިގެން ހުކުރު ދުވަހާ ހަމައަށް ކުރިއަށްދިޔަ ހަމަލާތަކުގައި އިސްރާއީލް ސިފައިން، ގާއްޒާގެ ދެއިރު އަލް-ބަލަހް، ނުސެއިރާތު ރެފިއުޖީ ކޭމްޕް އަދި އަޒް-ޒަވައިދާ ސަރަހައްދުތަކަށް ދިން ހަމަލާތަކުގައި އެތައް ބަޔަކު ޒަޚަމްވެފައިވާ ކަމަށް ފަލަސްތީނު ނިއުސް އޭޖެންސީ ވަފާއިން ބުނެފައިވެ އެވެ.
ވަފާގެ ރިޕޯޓުގައި ބުނެފައިވާ ގޮތުގައި ޝަހީދުވެފައިވާ މީހުންގެ ތެރެއިން ގިނައީ އަންހެނުންނާއި ކުޑަކުދިންނެވެ. އަދި ސިއްހީ އިދާރާތަކުން ކަށަވަރުކޮށްދީފައިވާ ގޮތުގައި އަލް-ބަލަހްގެ އަލް-އަޤްސާ ޝަހީދުންގެ ހޮސްޕިޓަލަށް 47 ޝަހީދުންގެ ހަށިގަނޑު ގެންގޮސްފައިވެ އެވެ.
މި ހަމަލާތަކާ ގުޅިގެން ބައިނަލްއަޤްވާމީ މުޖުތަމަޢުން ކަންބޮޑުވުން ފާޅުކޮށް، ވަގުތުން ހަނގުރާމަ ހުއްޓާލުމަށް ގޮވާލާފައިވެއެވެ. އަދި ގާއްޒާގެ އާންމުންނަށް އަމާޒުކޮށް ދެވޭ ހަމަލާތައް ހުއްޓާލުމަށް އިސްރާއީލަށް ގޮވާލާފައިވެ އެވެ.
