އޭޝިޔާ ސަރަހައްދުގެ އެންމެ ބޮޑު އެއް ސައުދާގަރު ކަމަށްވާ މުކޭޝް އަމްބާނީގެ ދަރިފުޅު އާނަންތު އަމްބާނީ ހދ.މަކުނުދޫއަށް ޒިޔާރަތް ކުރީ ޖެޓްސްކީއެއްގަ އެވެ.
އެރަށުން މައުލޫމާތު ދިން މީހަކު ބުނެފައިވަނީ، އާނަންތު އެ ރަށަށް އަރައި ބަނދަރު މަތީ ތިބި މީހުން ކައިރިން އެދުނީ ކުކުޅަކާއި މުސަޅެއް ގަންނަން ކަމަށެވެ.
އެމީހާ ބުނީ، އެ ރަށުގައި މުސަޅާއި ކުކުޅު ގެންގުޅޭ ތަނަކަށް ގެންދިއުމުން މުސަޅަކާއި ކުކުޅެއް އޭނާ ގަތް ކަމަށާއި، އެއަށްފަހު އޭނާ އެދުނީ އެ ރަށުގައި ދޫނި ގެންގުޅޭ ތަނަކަށް ދިއުމަށް ކަމަށެވެ.
އޭނާ ގޮވައިގެން ދޫނި ގެންގުޅޭ ގެއަކަށް ދިޔައިރު އެ ގޭގެ މީހުން އެވަގުތު ނެތުމުން އެތަނުން އޭނާ ދިޔައީ ބަނދަރަށެވެ. އަދި ބަނދަރަށް ދިޔައިރު އޭނާ ޗުއްޓީ ހޭދަކުރާ ރިސޯޓުގެ މުވައްޒަފުންނާއި އޭނާގެ ޑޮކްޓަރާއި، ސެކިއުރިޓީ ޓީމު ބަނދަރު މަތީގައި ތިބި ކަމަށެވެ.
އޭނާ ޗުއްޓީ ހޭދަކުރަމުންދަނީ މަކުނުދޫ ފަޅުގައި އޮންނަ ސޮނޭވާ ސީކްރެޓްގަ އެވެ. މި ރިސޯޓަކީ ރާއްޖޭގެ އެންމެ އަގުބޮޑު އަދި އެންމެ އެކްސްކްލޫސިވް ރިސޯޓުތަކުގެ ތެރޭގައި ހިމެނޭ ތަނެކެވެ.
