މިހާރު ރޮމޭނިއާ ގައި ކުރިއަށްދާ 10 ވަނަ ވޯލްޑް އެކުއަޓިކްސް ޖޫނިއަރ ސްވިމިންގ ޗެމްޕިއަންޝިޕްސްގައި، އަންހެނުންގެ ލޯންގކޯސް 4 ގުނަ 100 މީޓަރު މެޑްލޭ ރިލޭ އިވެންޓުގެ ގައުމީ ރެކޯޑު އައުކޮށްފިއެވެ.
ގައުމީ ފެތުންތެރިންމި ރެކޯޑު އައުކުރީ 05:04.04 އިން ނިންމައިގެނެވެ. މި ރިކޯޑް އާކުރި ޓީމުގައި ހިމެނެނީ މަލައިކާ ލިންދާ ޢިމްރާން، ސާރާ މުޙައްމަދު، މިރާލް ޢައިން ލަޠީފް އަދި އަމްނާ ތަޒްކިޔާ މިރުޞާދު އެވެ.
މި އިވެންޓުގެ ގައުމީ ރެކޯޑު އެންމެފަހުން އާކޮށްފައިވަނީ މަޑަގަސްކަރާގައި 2023 ވަނަ އަހަރު ކުރިއަށްދިޔަ އިންޑިއަން އޯޝަން އައިލަންޑް ގޭމްސްގައި، 05.15.09 އިން މި ރިލޭ އިވެންޓު ފުރިހަމަކޮށްގެންނެވެ. އެފަހަރު މިޤައުމީ ރެކޯޑް އާކުރި ޓީމުގައި ހިމެނުނީ އާއިޝަތު ސައުސަން، ޒައިނަބް އަބްދުﷲ ޝަފީޤް، ޙަނާން ޙުސައިން ޙަލީމް އަދި މިރާލް އައިން ލަތީފް އެވެ.
ރޮމޭނިއާ ގައި ކުރިއަށްދިޔަ 10 ވަނަ ވޯލްޑް އެކުއަޓިކްސް ޖޫނިއަރ ސްވިމިންގ ޗެމްޕިއަންޝިޕްސްގައި ދިވެހި ފެތުންތެރިން ވަނީ މުޅި ޖުމްލަ 9 އިވެންޓަކުން، 10 ގައުމީ ރެކޯޑު އާކޮށްފައެވެ.
