ސްޕެނިޝް ލީގުގައި ރޭ 3-0 ގެ ނަތީޖާއަކުން އޮސަސޫނާ ބަލިކޮށް، ބާސެލޯނާއިން އެއްވަނައިގައި ތިން ޕޮއިންޓުގެ ލީޑެއް ހޯދައިފިއެވެ.
މި މަހުގެ އަށްވަނަ ދުވަހު ކުޅުމަށް ކުރިން ތާވަލު ކުރެވިފައިވާ މި މެޗު ކުޅެފައިވަނީ ރޭގައެވެ. މެޗު ފަސްކޮށްފައިވަނީ ބާސެލޯނާގެ ޑޮކްޓަރު، ކާލްސް މިނާތޯ ގާސިއާ މަރުވުމުންނެވެ.
ބާސެލޯނާގެ ދަނޑުގައި ރޭ ކުޅުނު މެޗު ފެށިގެން 11 ވަނަ މިނެޓުގައި ފެރަން ޓޮރޭސް ވަނީ ލަނޑު ޖަހައި ބާސެލޯނާއަށް ކުރިހޯދަދީފައެވެ. އޭގެފަހުން، މެޗުގެ 21 ވަނަ މިނެޓުގައި ޑެނީ އޮލްމޯ އަށް އޮސަސޫނާގެ ކީޕަރު ސާޖިއޯ ހެރޭރާ ކުރި ފައުލަކާ ގުޅިގެން ބާސެލޯނާއަށް ވަނީ ޕެނަލްޓީއެއް ލިބިފައެވެ. ހެރޭރާ ވަނީ އޮލްމޯގެ ޕެނަލްޓީ މަތަކޮށްފައެވެ. ނަމަވެސް، ޖެހުމުގެ ކުރިން އޮސަސޫނާ ކުޅުންތެރިޔަކު އޭރިއާ ތެރެއަށް ވަނުމުން ރެފްރީ ވަނީ އަލުން ޕެނަލްޓީ ޖަހަން ނިންމާފައެވެ. އޮލްމޯ ވަނީ ދެވަނަ ފުރުސަތުގެ ބޭނުން ހިފައި، ބާސެލޯނާއަށް ލީޑު ފުޅާކޮށްދީފައެވެ.
ދެވަނަ ހާފު ފެށިގެން މެޗުގެ 77 ވަނަ މިނެޓުގައި ބާސެލޯނާއަށް ލީޑު ފުޅާކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން ނިކުތް ރޮބަޓް ލެވަންޑޯސްކީ އެވެ.
ބާސެލޯނާއަށް އެއްވަނައިގައި 63 ޕޮއިންޓު ލިބިފައިވާއިރު ދެވަނައިގައި ރެއާލް މެޑްރިޑަށް ލިބިފައިވަނީ 60 ޕޮއިންޓެވެ.
