ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން ކުރިއަށް ގެންދިޔަ ގައުމީ ބީޗް ވޮލީބޯލް ޗެމްޕިއަންޝިޕްގެ އަންހެން ޑިވިޝަންގެ ޗެމްޕިއަންކަން ހައްވާ ރާޝިދާ (ހައްވަ) އާއި އައިޝަތު މާޖިދާ (މާޖި) ގެ ޕެއާ އިން ހޯދައިފިއެވެ.

މި މަހުގެ 18 ވަނަ ދުވަހުން 21 ވަނަ ދުވަހުގެ ނިޔަލަށް ހުޅުމާލެ ޔޫތު ޕާކު ބީޗްވޮލީބޯލް ކޯޓުގައި ކުރިއަށްދިޔަ މި މުބާރާތުގެ ފައިނަލުގައި މާޖި އާއި ހައްވަގެ ޕެއާ އާ ވާދަކުރީ ފާތިމަތު ޒީނިއާ އާއި އައިމިނަތު އަރީޝާ (އަރީ)ގެ ޕެއާއެވެ. މާޖި އާއި ހައްވަގެ ޕެއާއިން މި މެޗު ކާމިޔާބުކުރީ 2-1 ސެޓުންނެވެ.

ވާދަވެރި ކުޅުމެއް ފެނިގެންދިޔަ މި މެޗުގެ ފުރަތަމަ ސެޓު، 21-18 އިން ކާމިޔާބުކުރީ ޒީނިއާ އާއި އަރީގެ ޕެއާއިންނެވެ. ނަމަވެސް، މާޖި އާއި ހައްވަ ވަނީ ކުޅުން ރަނގަޅުކުރުމަށްފަހު، ޖެހިގެން އައި ދެ ސެޓު ކާމިޔާބުކޮށް، މުބާރާތުގެ ޗެމްޕިއަންކަން ހޯދާފައެވެ. ގަމަށް ނިސްބަތްވާ މި ޕެއާއިން ދެ ސެޓު ކާމިޔާބުކުރީ 17-21 އަދި 15-12 އިންނެވެ.

ޒުވާން ދެ ކުޅުންތެރިން ކަމުގައިވާ ފާތިމަތު އަނާލް އާއި އަލްޔާ އަހުމަދުގެ ޕެއާއިންވެސް ވަނީ މި މުބާރާތުގައި މޮޅު ކުޅުމެއް ދައްކާފައެވެ. މި ޕެއާ ވަނީ ގައުމީ މުބާރާތާއި ގައުމީ ވޮލީ ލީގުން ތިންވަނަ ހޯދާފައެވެ. ގައުމީ ވޮލީ ލީގުން ދެވަނަ ލިބުނީ މާޖި އާއި ހައްވަގެ ޕެއާ އަށެވެ. އެ މުބާރާތުން ޗެމްޕިއަންކަން ހޯދީ އަރީ އާއި ޒީނިއާގެ ޕެއާ އިންނެވެ.

ވޮލީބޯލް އެސޯސިއޭޝަން އޮފް މޯލްޑިވްސް