އިނގިރޭސި ޕްރިމިއާ ލީގުގައި ރޭ ޓޮޓެންހަމް އަތުން ލަދުވެތިގޮތަކަށް، 4-0 ގެ ނަތީޖާއަކުން މެންޗެސްޓާ ސިޓީ ބަލިވެއްޖެއެވެ.
ރޭގެ މެޗުން ބަލިވުމާއެކު، ސިޓީ ވަނީ 2006 ވަނަ އަހަރުގެ ފަހުން ފުރަތަމަ ފަހަރަށް ވިދިވިދިގެން ފަސް މެޗުން ބަލިވެފައެވެ. އަދި މިއީ ގާޑިއޯލާ އިރުޝާދުދިން ޓީމަކުން، އަމިއްލަ ދަނޑުގައި މިހާތަނަށްވި އެންމެ ބޮޑު ބައްޔެވެ.
ސިޓީގެ ދަނޑުގައި ރޭ ކުޅުނު މެޗު ފެށިގެން 13 ވަނަ މިނެޓުގައި ޖޭމްސް މެޑިސަން ވަނީ ލަނޑެއް ޖަހައި ޓޮޓެންހަމްއަށް ކުރިހޯދަދީފައެވެ. އަދި އޭގެ ހަތް މިނެޓު ފަހުން އޭނާ ވަނީ އިތުރު ލަނޑެއް ޖަހައި ލީޑު ފުޅާކޮށްދީފައެވެ. އެ ޓީމުން ފުރަތަމަ ހާފު ނިންމާލީ ދެ ލަނޑުގެ ފަރަގަކާއެކުއެވެ.
ދެވަނަ ހާފު ފެށިގެން ހަތްވަނަ މިނެތުގައި ޓޮޓެންހަމްގެ ޑިފެންޑަރު، ޕެޑްރޯ ޕޮއްރޯ ވަނީ އެ ޓީމުގެ ތިންވަނަ ލަނޑު ކާމިޔާބުކޮށްފައެވެ. އަދި މެޗުގެ އިތުރު ވަގުތުގައި ބްރެނަން ޖޯންސަން ވަނީ އެ ޓީމުގެ ހަތަރުވަނަ ލަނޑު ކާމިޔާބުކޮށްފައެވެ.
ރޭގެ މެޗު ފެށުމުގެ ކުރިން ސިޓީގެ ރޮޑްރީ ވަނީ އޭނާއަށް ލިބުނު ބެލެންޑޯ އެވޯޑު ދައްކާލާފައެވެ. ނަމަވެސް، މި ލަދުވެތި ބައްޔާއެކު އެ ޓީމުގެ އުފާފާޅުކުރުން ވަނީ ހަރާބުވެފައެވެ.
މެޗުން ބަލިވިނަމަވެސް، ސިޓީ އޮތީ ތާވަލުގެ ދެވަނައިގައެވެ. ނަމަވެސް، އެއްވަނައިގައި އޮތް ލިވަޕޫލަށް އަށް ޕޮއިންޓުގެ ލީޑެއް ނެގުމުގެ ފުރުސަތު ލިބޭނެއެވެ.
