ޗެލްސީގެ ކެޕްޓަން، ރީސް ޖޭމްސްއަށް އަނިޔާވެ އަނެއްކާވެސް ކުޅުމާ ދުރަށް ދާން ޖެހިއްޖެކަމަށް އެ ޓީމުގެ ކޯޗު، އެންޒޯ މަރެސްކާ ބުނެފިއެވެ.
އުމުރުން 24 އަހަރުގެ ޑިފެންޑަރުގެ ފަލަމަސްގަނޑަށް ލިބުނު އަނިޔާއަކާ ގުޅިގެން، މިދިޔަ ސީޒަނުވެސް އޭނާ ހުރީ ދިގު މުއްދަތަކަށް ކުޅުމާ ދުރުގައެވެ. އެޔަށްފަހު، އޭނާ އެނބުރި އައީ މިދިޔަ މަހުއެވެ.
ޖޭމްސްގެ ފަލަމަސްގަނޑަށް އަނެއްކާވެސް އަނިޔާވެފައިވާ ކަމަށާއި، ހޮނިހިރު ދުވަހު ލެސްޓާ ސިޓީއާ ދެކޮޅަށް ކުޅޭ މެޗުގައި އޭނާއަށް ނުކުޅެވޭނެކަން މަރެސްކާ ވަނީ ކަށަވަރުކޮށްދީފައެވެ. މަރެސްކާ ބުނީ މިވަގުތު އަނިޔާގައި ހުރީ ހަމައެކަނި ޖޭމްސް ކަމަށެވެ. އޭނާއާށް މީގެ ދެ ދުވަސް ކުރިން އަނިޔާވި ކަމަށާއި، އިތުރަށް ރިސްކު ނަގަން ބޭނުން ނުވާކަމަށް މަރެސްކާ ބުންޏެވެ.
މަރެސްކާ އިތުރަށް ބުނީ، ޖޭމްސް ކުޅުމާ ދުރަށް ދާން ޖެހުނީ ކިހާ މުއްދަތަކަށްކަން އަދި ނޭންގޭ ކަމަށެވެ. ނަމަވެސް، އަވަސް މުސްތަގުބަލެއްގައި އެނބުރި އަންނާނެ ކަމަށް އުއްމީދުކުރާ ކަމަށް އޭނާ ބުންޏެވެ.
އިންޓަނޭޝަނަލް ބްރޭކުގައި ކޯލް ޕާމާ، ލެވީ ކޮލްވެލް، ވެސްލީ ފޮފާނާ، މާލޯ ގުސްތޯ އަދި ރޯމިއޯ ލަވިއާއަށް އެކިވަރުގެ އަނިޔާވިނަމަވެސް، މިހާރު އެ ހުރިހާ ކުޅުންތެރިންވެސް ވަނީ ފިޓު ވެފައެވެ.
ޕްރިމިއާ ލީގުގައި މާދަމާ ހަވީރު ޗެލްސީން ލެސްޓާއާ ދެކޮޅަށް ނިކުންނައިރު، ޗެލްސީ އޮތީ ތާވަލުގެ ތިންވަނައިގައެވެ.
