މެންޗެސްޓާ ސިޓީގެ ކޯޗު، ޕެޕް ގާޑިއޯލާ އެ ޓީމާއެކު އިތުރު އެއް އަހަރު ދުވަހުގެ އެއްބަސްވުމެއްގައި ސޮއިކުރަން ނިންމައިފިއެވެ.
ސިޓީއާއެކު ގާޑިއޯލާ އެންމެ ފަހުން ހެދި އެއްބަސްވުމުގެ މުއްދަތި ހަމަވާން އޮތީ މިއަހަރުގެ ނިޔަލަށެވެ. މިއަހަރަށްފަހު، އޭނާ ސިޓީ ދޫކޮށްލާނެ ކަމަށް ގިނަ މީޑިއާތަކަކުން ރިޕޯޓު ކުރިނަމަވެސް، އޭނާ ވަނީ އިތުރު އެއްބަސްވުމެއްގައި ސޮއިކުރަން ނިންމާފައެވެ.
އުމުރުން 53 އަހަރުގެ ގާޑިއޯލާ ސިޓީއާ ގުޅުނީ 2016 ވަނަ އަހަރުއެވެ. އޭގެފަހުން އޭނާ ވަނީ އެ ޓީމާއެކު ހަ ޕްރިމިއާ ލީގު ހިމެނޭހެން ޖުމްލަ 18 މުބާރާތެއް ކާމިޔާބުކޮށްފައެވެ.
ސިޓީއާއެކު ގާޑިއޯލާ ހޯދީ އެންމެ ބޮޑު ކާމިޔާބީއަކީ ”ޓްރެބަލް“ ފުރިހަމަ ކުރުމެވެ. ސިޓީން ވަނީ އެ ސީޒަނުގައި ޕްރިމިއާ ލީގާއި އެފްއޭ ކަޕުގެ އިތުރުން ޗެމްޕިއަންސް ލީގު ކާމިޔާބުކޮށްފައެވެ. މިއާއެކު، ސިޓީ ވެފައިވަނީ ”ޓްރެބަލް“ ފުރިހަމަ ކުރި، އިންގްލެންޑްގެ ދެވަނަ ކްލަބަށެވެ.
ގާޑިއޯލާގެ އިރުޝާދާއެކު ކުޅުނު މެންޗެސްޓާ ސިޓީ ވެފައިވަނީ، ވިދިވިދިގެން ޕްރިމިއާ ލީގުގެ ހަތަރު ތަށި ކާމިޔާބުކުރި ފުރަތަމަ ކްލަބަށެވެ. އަދި ލީގުގައި 100 ޕޮއިންޓު ހަމަކުރި ފުރަތަމަ ޓީމަކީވެސް ސިޓީއެވެ.
ބާސެލޯނާ އަދި މަޔާން މިޔުނިކަށް އިރުޝާދުދިނުމަށްފަހު، ގާޑިއޯލާ ވަނީ ސިޓީއަށް ބަދަލުވެ، ތިން ފަހަރު މަތިން އެއްބަސްވުން އައުކޮށްފައެވެ. އެއީ 2018، 2020 އަދި 2022 ގައެވެ.
ސިޓީ މިވަގުތު އޮތީ ޕްރިމިއާ ލީގު ތާވަލުގެ ދެވަނައިގައެވެ. އެއްވަނައިގައި އޮތީ ލިވަޕޫލެވެ.
