ޔުއެފާ ނޭޝަންސް ލީގުގައި ރޭ ފަހުވަގުތު ބްރަޔަން ޒަރަގޯޒާ ޖެހި ލަނޑާއެކު ސެޕެއިނުން 3-2 ގެ ނަތީޖާއަކުން ސްވިޒަލެންޑް ބަލިކޮށްފިއެވެ.
ރޭގެ މެޗަށް ނިކުތްއިރުވެސް ސްޕެއިނުން ވަނީ ގުރޫޕުގެ އެއްވަނަ ކަށަވަރުކޮށްފައެވެ. އަދި ސްވިޒަލެންޑް އޮތީ ގުރޫޕުގެ ފުލުގައެވެ. މި މެޗުގެ ނަތީޖާ ކޮންމެ ގޮތަކަށް ނިކުތް ނަމަވެސް، ދެ ޓީމު އޮތް ހިސާބަކަށް ބަދަލެއް ނާންނާނެއެވެ.
މެޗުގެ 32 ވަނަ މިނެޓުގައި ސްޕެއިނަށް ވަނީ ޕެނަލްޓީއެއް ލިބިފައެވެ. ޕެޑްރީ ފޮނުވާލި ޕެނަލްޓީ، ސްވިޒަލެންޑްގެ ކީޕަރު ދިފާއުކުރިނަމަވެސް، ރީބައުންސުގައި ޔެރެމީ ޕިނޯ ވަނީ ލަނޑު ޖަހާފައެވެ. އެ ޓީމުން ފުރަތަމަ ހާފު ނިންމާލީ އެއް ލަނޑުގެ ފަރަގަކާއެކުއެވެ.
ދެވަނަ ހާފު ފެށިގެން، މެޗުގެ 63 ވަނަ މިނެޓުގައި ޖޯލް މޮންޓޭރޯ ވަނީ ލަނޑެއް ޖަހައި، ސްވިޒަލެންޑަށް ނަތީޖާ ހަމަހަމަކޮށްދީފައެވެ. ނަމަވެސް، އޭގެ ފަސް މިނެޓު ފަހުން ބްރަޔަން ގިލް ވަނީ ލަނޑެއް ޖަހައި، ސްޕެއިނަށް އަލުން ލީޑު ހޯދަދީފައެވެ.
މެޗު ނިމެން ފަސް މިނެޓަށް ވެފައިވަނިކޮށް ސްވިޒަލެންޑަށް ލިބުނު ޕެނަލްޓީއެއް ކާމިޔާބުކޮށް، އެންޑީ ޒެކީރީ ވަނީ ދެވަނަ ފަހަރަށް އެ ޓީމަށް ނަތީޖާ ހަމަހަމަ ކޮށްދީފައެވެ. ސްޕެއިން މޮޅުވި ލަނޑު، މެޗުގެ 93 ވަނަ މިނެޓުގައި ޒަރަގޯޒާ ކާމިޔާބުކުރީ އެ ޓީމަށް ލިބުނު ޕެނަލްޓީއަކުންނެވެ.
ސްޕެއިން އާއެކު މި ގުރޫޕުގެ ދެވަނަ ޓީމެއްގެ ގޮތުގައި ކުއާޓާ ފައިނަލަށް ދަތުރުކުރީ ޑެންމާކެވެ. ޑެންމާކާއި ސާބިއާ ބައްދަލުކުރި މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރުވެގެނެވެ.
