ބީސާދަ ސްޕޯޓްސް ފެސްޓިވަލްގެ 16 އަހަރުން ދަށުގެ ފުޓްސަލް މުބާރާތުގެ ފައިނަލުގައި 1-0 ގެ ނަތީޖާއަކުން ނޯވާ އެސްސީ ބަލިކޮށް، ފިނެމާ ފުޓްސަލް ޓީމުން މުބާރާތުގެ ޗެމްޕިއަންކަން ހޯދައިފިއެވެ.
ނޯވާ ފައިނަލަށް ދަތުރުކުރީ، ފުރަތަމަ ބުރުގެ އެއްވަނަ ޓީމުގެ ގޮތުގައެވެ. އަދި ފިނެމާ އިން ވަނީ ސެމީ ފައިނަލުގައި ޕެނަލްޓީ ޖަހައިގެން ރުއްގަނޑު ކިޑްސް ބަލިކޮށްފައެވެ.
އިއްޔެ ހަވީރު ކުޅުނު ފައިނަލް މެޗުގެ ހަމައެކަނި ލަނޑު ފިނެމާއަށް ކާމިޔާބުކޮށްދިނީ ހޫދު މުހައްމަދު ސިޒާނެވެ. ފައިނަލް މެޗުގެ މޮޅު ކުޅުންތެރިޔަކަށް ހޮވުނީވެސް ހޫދެވެ.
ފައިނަލް މެޗަށްފަހު، ފުޓްސަލް އަދި ހޭންޑްބޯޅަ މުބާރާތުގެ ނިންމުމުގެ ރަސްމިއްޔާތު ވަނީ ބާއްވާފައެވެ. ފުޓްސަލް މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާ އަދި އެންމެ މޮޅު ކުޅުންތެރިޔަކަށް ހޮވިފައިވަނީ ފިނެމާގެ ހޫދެވެ.
މުބާރާތުގެ އެންމެ މޮޅު ފަސް ކުޅުންތެރިންގެ ތެރޭގައި ހިމެނިފައިވަނީ ނޯވާގެ މުހައްމަދު ވިޝާލް ވަޖީހާއި އަހުމަދު ނިޝާލް ނިޒާމް އަދި ފިނެމާގެ މުހައްމަދު އަފްލާހު ބިން އަލީ އަސްލަމާއި ހުސައިން އައްލާމް ބިން މުހައްމަދުގެ އިތުރުން ރުއްގަނޑުގެ މުހައްމަދު އަޔާން އަބްދުﷲ އެވެ. މުބާރާތުގެ އެންމެ އުއްމީދީ ކުޅުންތެރިޔަކީ ރުއްގަނޑުގެ އަހުމަދު ޒައިކް ޒިހުނީއެވެ. އަދި ފެއާ ޕްލޭ ޓީމަކީ ރަންވެލިއެވެ.
ހޭންޑްބޯޅަ މުބާރާތުގައި އެންމެ ގިނަ ލަނޑު ޖަހައި، މުބާރާތުގެ އެންމެ މޮޅު ކުޅުންތެރިޔަކަށް ހޮވިފައިވަނީ އެމްވީޕީސްގެ މަރިޔަމް އަނާލް ހުސައިންއެވެ. މުބާރާތުގެ އެންމެ މޮޅު ހަތް ކުޅުންތެރިންގެ ތެރޭގައި ހިމެނުނީ އެމްވީޕީސްގެ ނީމް އަހުމަދު ނިޝާމް، މަރިޔަމް ސިމާހާ ބިންތު މާރިފް، އައިޝަތު އިބާނާ ބިންތު މާރިފް އަދި މަރިޔަމް މީޝާ މުހައްމަދުގެ އިތުރުން ފަޔާ ސްޓާގެ އައިޝަތު ޝިފްލާ ބިންތު އިބްރާހިމް ސަހުމީލް އާއި މަރިޔަމް ޝިނާ ނައީމް އަދި މޫން ސްޓާގެ އައިޝަތު އީޝަލް ބިންތު ޝިފާންއެވެ،
