ފީފާ ރެޖިސްޓާޑް އެކުވެރިކަމުގެ ދެ ވަަނަ މެޗުގައި މިއަދު ބަންގްލަދޭޝް އިން ފަހަތުން އަރައި 2-1 ގެ ނަތީޖާއަކުން ރާއްޖެ ބަލިކޮށްފިއެވެ.
ބަންގްލަދޭޝާ ދެކޮޅަށް މީގެ ތިން ދުވަސް ކުރިން ކުޅުނު މެޗުގައި ގައުމީ ޓީމުން ވަނީ 1-0 ގެ ނަތީޖާއަކުން މޮޅުވެފައެވެ.
ބަޝުންދަރާ ކިންގްސް އެރީނާގައި މިއަދު ކުޅުނު މެޗުގެ 23 ވަނަ މިނެޓުގައި އަލީ ފާސިރު (ސެންޓޭ) ވަނީ ލަނޑެއް ޖަހައި، ގައުމީ ޓީމަށް ކުރިހޯދަދީފައެވެ. ބަންގްލަދޭޝް އަތުން ގައުމީ ޓީމު މޮޅުވި މެޗުގައިވެސް ލަނޑު ޖެހީ ސެންޓޭއެވެ.
ބަންގްލަދޭޝަށް ވަނީ ނަތީޖާ ހަމަހަމަ ކުރުމަށް ރަނގަޅު ތިން ފުރުސަތެއް ލިބިފައެވެ. އެގޮތުން، ރަކީބް ހުސެއިން އާއި ޝެއިހް މޮރްސަލީން ޖެހި ބޯޅަ ބޭރަށް ދިޔައިރު، އަހުމަދު ފަހީމް ފޮނުވާލި ބޯޅަ ރާއްޖޭގެ ކީޕަރު ހުސައިން ޝަރީފް ވަނީ ދިފާއުކޮށްފައެވެ. ނަމަވެސް، ހާފު ނިމުމުގެ ކުރިން ބަންގްލަދޭޝުން ވަނީ ނަތީޖާ ހަމަހަމަ ކޮށްފައެވެ. މެޗުގެ 43 ވަނަ މިނެޓުގައި އެ ޓީމަށް ލަނޑު ޖަހައިދިނީ މުޖީބުއްރަހުމާން ޖޯނީ އެވެ.
ދެވަނަ ހާފުގައި ދެ ޓީމަށްވެސް ވަނީ ލީޑު ނަގަން ރަނގަޅު ފުރުސަތުތަކެއް ލިބިފައެވެ. އެގޮތުން، ހާފުގެ ކުރީކޮޅު ރަކީބް ފޮނުވާލި ބޯޅަ، ރާއްޖޭގެ ކީޕަރު ހުސައިން ވަނީ މަތަކޮށްފައެވެ. އަދި ރާއްޖޭގެ އަހުމަދު ރިޒްވާން (ރިޒޭ) ބޮލުން ޖެހި ބޯޅަ، ބަންގްލަދޭޝްގެ ކީޕަރު މިތުލް މަރްމާ ވަނީ ދިފާއުކޮށްފައެވެ.
މެޗުގެ އިތުރު ވަގުތުގައި ބަންގްލަދޭޝް މޮޅުކޮށްދިނީ، ބަދަލު ކުޅުންތެރިއެއްގެ ގޮތުގައި ކުޅެން ނިކުތް ޕަޕޯން ސިންގް އެވެ.
ބަންގްލަދޭޝް އިން މިހާތަނަށް ނުވަ ފަހަރު ރާއްޖެ ބަލިކުރިއިރު، ރާއްޖޭން ވަނީ ހަތް މެޗު ކާމިޔާބުކޮށްފައެވެ. އަދި ހަތަރު މެޗު ނިމުނީ ދެ ޓީމު އެއްވަރުވެގެނެވެ.
