ބީސާދަ ސްޕޯޓްސް ފެސްޓިވަލްގެ 16 އަހަރުން ދަށުގެ ހޭންޑްބޯޅަ މުބާރާތުގެ ފައިނަލުގައި ފަޔާ ސްޓާ ބަލިކޮށް، އެމްވީޕީސް އިން ޗެމްޕިއަންކަން ހޯދައިފި އެވެ.
މިއަހަރުގެ ފެސްޓިވަލްގެ ހޭންޑްބޯޅަ މުބާރާތުގައި ޖުމްލަ ތިން ޓީމަކުން ވަނީ ބައިވެރިވެފަ އެވެ. އެމްވީޕީސް ފައިނަލަށް ދަތުރުކުރީ ފުރަތަމަ ބުރުގެ އެއްވަނަ ޓީމުގެ ގޮތުގަ އެވެ. އަދި ފަޔާ ސްޓާ އަކީ ދެވަނަ ޓީމެވެ.
އިއްޔެ ހަވީރު ކުޅުނު ފައިނަލް މެޗުން އެމްވީޕީސް މޮޅުވީ 16-9 ގެ ނަތީޖާއަކުންނެވެ. މި މެޗުގައި އެމްވީޕީސްގެ މަރިޔަމް އަނާލް ހުސައިން އާއި މަރިޔަމް ސިމާހާ ބިންތި މާރިފް ވަނީ ހަތް ލަނޑު ޖަހާފަ އެވެ. އެ ޓީމުގެ އަނެއް ދެ ލަނޑު ކާމިޔާބުކުރީ އާއިޝަތު އިބާނާ ބިންތި މާރިފް އެވެ.
ފައިނަލް މެޗުގައި ފަޔާ ސްޓާގެ މަރިޔަމް ޝިނާ ނައީމް ވަނީ ހަ ލަނޑު ޖަހާފައެވެ. އަނެއް ތިން ލަނޑު ޖެހީ އާއިޝަތު ޝިފްލާ ބިންތި އިބްރާހިމް ޝަހުމީލެވެ.
ހޭންޑްބޯޅަ މުބާރާތުގެ އިނާމު ދިނުމުގެ ރަސްމިއްޔާތު ކުރިޔަށްދާނީ މިއަދު ހަވީރު ކުޅޭ ފުޓްސަލް މުބާރާތުގެ ފައިނަލަށް ފަހުއެވެ. ފުޓްސަލްގެ ފައިނަލުގައި ބައްދަލުކުރާނީ ނޯވާ އެސްސީ އާއި ފިނެމާ ފުޓްސަލް ޓީމެވެ.
