ބީސާދަ ސްޕޯޓްސް ފެސްޓިވަލްގެ 16 އަހަރުން ދަށުގެ ފުޓްސަލް މުބާރާތުގެ ސެމީ ފައިނަލުގައި ޕެނަލްޓީ ޖަހައިގެން ރުއްގަނޑު ކިޑްސް ބަލިކޮށް، ފިނެމާ ފުޓްސަލް ޓީމް ފައިނަލަށް ދަތުރުކޮށްފިއެވެ.
ހަތަރު ޓީމަކުން ވާދަކުރި މި މުބާރާތުގެ ފައިނަލުގެ ފުރަތަމަ ޖާގަ ހޯދީ ނޯވާ އެސްސީ އިންނެވެ. ރުއްގަނޑާއި ފިނެމާ އަކީ ތާވަލުގެ ދެވަނަ އަދި ތިންވަނަ ޓީމެވެ. ލީގު ބުރުގައި މި ދެ ޓީމު ބައްދަލުކުރި މެޗު 1-0 ގެ ނަތީޖާއަކުން ކާމިޔާބުކުރީ ރުއްގަނޑުންނެވެ.
އިއްޔެ ހަވީރު ކުޅުނު ސެމީ ފައިނަލް މެޗުގެ ފުރިހަމަ ވަގުތުހަމަވިއިރު، ދެ ޓީމު ވަނީ 1-1 ގެ ނަތީޖާއަކުން އެއްވަރުވެފައެވެ. ފިނެމާގެ ލަނޑު ޖެހީ ހޫދު މުހައްމަދު ޝިޒާނެވެ. އަދި ރުއްގަނޑުން ލަނޑު ޖެހީ މުހައްމަދު އަޔާން އަބްދުﷲ އެވެ. މެޗުގެ ފުރިހަމަ ވަގުތުހަމަވިއިރު ދެ ޓީމު އެއްވަރުވުމާއެކު ނަތީޖާ ނެރެފައިވަނީ ޕެނަލްޓީ ޖަހައިގެނެވެ.
ޕެނަލްޓީ ޖަހައިގެން ފިނެމާއިން މެޗު ކާމިޔާބުކުރީ 3-2 ގެ ނަތީޖާއަކުންނެވެ. ފިނެމާއިން ޕެނަލްޓީ ކާމިޔާބުކުރީ މުހައްމަދު އަފްލާހު ބިން އަލީ އަސްލަމް އާއި ހުސައިން އައްލާމް ބިން މުހައްމަދެވެ. ރުއްގަނޑި ކިޑްސް އިން ޕެނަލްޓީ ކާމިޔާބުކުރެވުނީ ކިޔާން ބިން މުހައްމަދު ފިރުޝާނަށެވެ.
ނޯވާ އާއި ފިނެމާ ބައްދަލުކުރާ ފައިނަލް މެޗު ކުޅުމަށް ހަމަޖެހިފައިވަނީ މާދަމާ ހަވީރުއެވެ. ލީގު ބުރުގައި މި ދެ ޓީމު ބައްދަލުކުރި މެޗު ނިމުނީ 2-2 ގެ ނަތީޖާއަކުން އެއްވަރުވެގެނެވެ.
16 އަހަރުން ދަށުގެ ހޭންޑްބޯޅަ މުބާރާތުގެ ފައިނަލް މެޗު މިއަދު ހަވީރު ކުޅޭނެއެވެ. ފައިނަލުގައި ބައްދަލުކުރާނީ އެމްވީޕީސް އާއި ފަޔާ ސްޓާއެވެ.
