ހދ. ނޭކުރަންދޫގައި މިހާރު ކުރިޔަށްދާ ބީސާދަ ސްޕޯޓްސް ފެސްޓިވަލްގެ 16 އަހަރުން ދަށުގެ ފުޓްސަލް މުބާރާތުގެ ފައިނަލަށް ނޯވާ އެސްސީ ދަތުރުކުރިއިރު، ސެމީ ފައިނަލުގައި ރުއްގަނޑު ކިޑްސް އާއި ފިނެމާ ފުޓްސަލް ޓީމް ބައްދަލުކުރަން ޖެހިއްޖެއެވެ.
ހަތަރު ޓީމަކުން ބައިވެރިވި މި މުބާރާތުގެ ލީގު ބުރުން އެއްވަނަ ހޯދާ ޓީމަކަށް ފައިނަލުން ޖާގަ ލިބޭއިރު، ފައިނަލުގެ ފުރަތަމަ ޖާގައަށް ވާދަކުރީ ނޯވާ އާއި ރުއްގަނޑު ކިޑްސްއެވެ.
ނޯވާ އާއި ރުއްގަނޑު ކިޑްސް އިއްޔެ ބައްދަލުކުރި މެޗަށް ނިކުތްއިރު، ދެ ޓީމަށްވެސް ލިބިފައިވަނީ ހަތަރު ޕޮއިންޓެވެ. މެޗު ކާމިޔާބުކޮށް، ފައިނަލަށް ދިއުމުގެ ފުރުސަތު ދެ ޓީމަށްވެސް ވަނީ ލިބިފައެވެ. ނަމަވެސް، މި މެޗު ނިމުނީ 0-0 ގެ ނަތީޖާއަކުން ދެ ޓީމު އެއްވަރު ވެގެނެވެ. މި މެޗުގެ މޮޅު ކުޅުންތެރިޔަކަށް ހޮވުނީ ރުއްގަނޑުގެ ކީޕަރު، މުހައްމަދު އަޝްހަމް ފަޒީލެވެ.
މި ނަތީޖާއާއެކު ނޯވާ އާއި ރުއްގަނޑަށް ލިބިފައިވަނީ ފަސް ޕޮއިންޓެވެ. ފައިދާ ގޯލު ތަފާތުން އެއްވަނަ ލިބުނީ ނޯވާ އަށެވެ. އަދި ރުއްގަނޑު ވަނީ ސެމީ ކުޅެން ޖެހިފައެވެ.
ފިނެމާ ސެމީއަށް ދަތުރުކުރީ އިއްޔެ 4-2 ގެ ނަތީޖާއަކުން ކްލަބް ރަންވެލި ބަލިކުރުމަށްފަހުއެވެ. މި މެޗުގެ މޮޅު ކުޅުންތެރިޔަކަށް ހޮވުނު، ފިނެމާގެ ހޫދު މުހައްމަދު ސިޒާން ވަނީ ދެ ލަނޑު ޖަހާފައެވެ. އެ ޓީމުގެ އަނެއް ދެ ލަނޑު ކާމިޔާބުކުރީ ހުސައިން އައްލާމް ބިން މުހައްމަދާއި ޔަޝާލް މުހައްމަދު ނަސީރެވެ. ރަންވެލިގެ ލަނޑުތައް ޖެހީ އަހުމަދު އިބާން އިމްރާނާއި އަހުމަދު މަހްމޫދެވެ.
ފިނެމާ އާއި ރުއްގަނޑު ބައްދަލުކުރާ ސެމީ ފައިނަލް މެޗު ކުޅުމަށް ހަމަޖެހިފައިވަނީ މިއަދު ހަވީރުއެވެ. ލީގު ބުރުގައި މި ދެ ޓީމު ބައްދަލުކުރި މެޗު 1-0 ގެ ނަތީޖާއަކުން ކާމިޔާބުކުރީ ރުއްގަނޑު ކިޑްސްއެވެ.
