ހދ. ނޭކުރަންދޫގައި މިހާރު ކުރިޔަށްދާ ބީސާދަ ސްޕޯޓްސް ފެސްޓިވަލްގައި އެމްވީޕީސް އިން ކުޅުނު ފުރަތަމަ މެޗު ކާމިޔާބުކުރިއިރު، ރުއްގަނޑު ކިޑްސް އާއި ކްލަބް ރަންވެލި ބައްދަލުކުރި މެޗު އެއްވަރުވެއްޖެއެވެ.
ޖުމްލަ ފަސް އިވެންޓެއް ހިމެނޭ މި އިވެންޓުގައި މިވަގުތު ކުރިޔަށްދަނީ 16 އަހަރުން ދަށުގެ ފުޓްސަލް އާއި ހޭންޑްބޯޅައެވެ، ހޭންޑްބޯޅަ މުބާރާތުގެ ފުރަތަމަ މެޗު ކާމިޔާބުކުރީ ފަޔާ ސްޓާ އިންނެވެ. އަދި ފުޓްސަލް މުބާރާތުގެ ފުރަތަމަ ދެ މެޗުން މޮޅުވީ ނޯވާ ސްޕޯޓްސް ކްލަބާއި ރުއްގަނޑު ކިޑްސްއެވެ.
އިއްޔެ ހަވީރު ކުޅުނު ހޭންޑްބޯޅަ މެޗުން އެމްވީޕީސް އިންވަނީ 9-4 ގެ ނަތީޖާއަކުން ފަޔާ ސްޓާ ބަލިކޮށްފައެވެ. މި މެޗުގެ މޮޅު ކުޅުންތެރިޔަކަށް ހޮވުނު، އެމްވީޕީސްގެ އާއިޝަތު އަނާލް ހުސައިން ވަނީ ފަސް ލަނޑު ޖަހާފައެވެ. މީގެއިތުރުން، އާއިޝަތު އިބާނާ ބިންތި މާރިފް ތިން ލަނޑު ޖެހިއިރު މަރިޔަމް ސިމާހާ ބިންތި މާރިފް ވަނީ އެއް ލަނޑު ޖަހާފައެވެ. ފަޔާ ސްޓާގެ ލަނޑުތައް ކާމިޔާބުކުރީ އާއިޝަތު ޝިފްލާ ބިންތި އިބްރާހިމް ޝަހުމީލް އާއި މަރިޔަމް ޝިނާ ނައީމްއެވެ. މި ދެ ކުޅުންތެރިންވެސް ވަނީ ދެ ލަނޑު ޖަހާފައެވެ.
އިއްޔެ ހަވީރު ރުއްގަނޑު ކިޑްސް އާއި ރަންވެލި ބައްދަލުކުރި ފުޓްސަލް މެޗު ނިމުނީ 0-0 ގެ ނަތީޖާއަކުން ދެ ޓީމު އެއްވަރުވެގެނެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ ރަންވެލިގެ ފާލިހު ފަތުހުﷲ އެވެ.
ހޭންޑްބޯޅަ މުބާރާތުގެ ލީގު ބުރުގެ ފަހު މެޗު މިއަދު ކުޅޭނެއެވެ. މި މެޗުގައި ބައްދަލުކުރާނީ މޫން ސްޓާ އާއި އެމްވީޕީސްއެވެ. އަދި މިއަދު ކުޅޭ ފުޓްސަލް މެޗުގައި ނޯވާ ނިކުންނާނީ ފިނެމާ ފުޓްސަލް ޓީމާ ދެކޮޅަށެވެ.
