ސްޕެނިޝް ލީގުގައި ރޭ ސޮސިއެޑާޑުން 1-0 ގެ ނަތީޖާއަކުން ބާސެލޯނާ ބަލިކޮށްފިއެވެ.
ބާސެލޯނާއިން ރޭގެ މެޗަށް ނިކުތްއިރު، ޓީމުގެ އެންމެ މުހިންމު އެއް ކުޅުންތެރިޔާ، ލަމީން ޔަމާލް ހުރީ އަނިޔާގެ ސަބަބުން ކުޅުމާ ދުރުގައެވެ. މިއީ މި ސީޒަނުގައި ބާސެލޯނާ ބަލިވި ދެވަނަ މެޗެވެ.
ސޮސިއެޑާޑުގެ ދަނޑުގައި ރޭ ކުޅުނު މެޗުގެ ހަމައެކަނި ލަނޑު ކާމިޔާބުކުރީ ޝެރާލްޑޯ ބެކާއެވެ. މެޗުގެ 33 ވަނަ މިނެޓުގައި އޭނާ ސޮސިއެޑާޑަށް ލީޑު ނަގައިދިންއިރު، ދެވަނަ ހާފުގައިވެސް އޭނާއަށް ވަނީ ރަނގަޅު ފުރުސަތުތަކެއް ލިބިފައެވެ.
މެޗު ފެށިގެން 15 ވަނަ މިނެޓުގައި ރޮބަޓް ލެވަންޑޯސްކީ ވަނީ ލަނޑެއް ޖަހާފައެވެ. ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) ބެލުމަށްފަހު ރެފްރީ ނިންމީ އޮފްސައިޑް ކަމަށެވެ.
ބާސެލޯނާއިން ވަނީ ސޮސިއެޑާޑުގެ ދަނޑުގައި އެންމެ ފަހުން ކުޅުނު ހަތަރު މެޗުވެސް ކާމިޔާބުކޮށްފައެވެ. ރޭގެ މެޗުގެ ފުރަތަމަ ހާފުގައި ފްރޭންކީ ޑި ޔޯންގެ ކުޅުން ދަށްވުމުގެ ސަބަބުން، ދެވަނަ ހާފުގައި އޭނާގެ ބަދަލު ކުޅެން ނިކުތީ ޑެނީ އޮލްމޯއެވެ. މިއާއެކު، ބާސެލޯނާއިން ވަނީ ކުޅުން ރަނގަޅުކޮށްފައެވެ. ނަމަވެސް، އެ ޓީމުން ލަނޑެއް ޖެހުމަށް ކުރި މަސައްކަތް ކާމިޔާބުވެފައެއް ނުވެއެވެ.
މި ނަތީޖާއާއެކު ރެއާލަށް ވަނީ ތިން ޕޮއިންޓަށް ފަރަގު ކުޑަކުރުމުގެ ފުރުސަތު ލިބިފައެވެ. ބާސެލޯނާއަށް 13 މެޗުން ލިބުނީ 33 ޕޮއިންޓެވެ. އަދި ރެއާލަށް 12 މެޗުން ލިބިފައިވަނީ 27 ޕޮއިންޓެވެ.
