ހދ. ނޭކުރަންދޫގައި މިހާރު ކުރިޔަށްދާ ބީސާދަ ސްޕޯޓްސް ފެސްޓިވަލްގައި އިއްޔެ ކުޅުނު މެޗުތައް ކާމިޔާބުކޮށް، ރުއްގަނޑު ކިޑްސް އާއި ފަޔާ ސްޓާއިން ފެށުން ރަނގަޅުކޮށްފިއެވެ.
16 އަހަރުން ދަށުގެ ފުޓްސަލްގައި އިއްޔެ ރުއްގަނޑު ކިޑްސް ނިކުތީ ފިނެމާ އެފްޓީއާ ދެކޮޅަށެވެ. މި މެޗު 1-0 ގެ ނަތީޖާއަކުން ކާމިޔާބުކުރީ ރުއްގަނޑު ކިޑްސްއެވެ. މި މެޗުގެ ހަމައެކަނި ލަނޑު، ރުއްގަނޑު ކިޑްސްއަށް ޖަހައިދިނީ އަހުމަދު ޒައިކް ޒިހުނީއެވެ. މެޗުގެ މޮޅު ކުޅުންތެރިޔަކަށް ހޮވުނީވެސް ޒައިކް އެވެ.
16 އަހަރުން ދަށުގެ ހޭންޑްބޯޅަ މުބާރާތުގެ ފުރަތަމަ މެޗުގައި ފަޔާ ސްޓާއިން މޫން ސްޓާގެ މައްޗަށް ކުރިހޯދީ 8-5 ގެ ނަތީޖާއަކުންނެވެ. މި މެޗުގެ މޮޅު ކުޅުންތެރިޔަކަށް ހޮވުނު، ފަޔާ ސްޓާގެ އައިޝަތު ޝިފާ ބިންތި އިބްރާހިމް ޝަހުމީލް ވަނީ ފަސް ލަނޑު ޖަހާފައެވެ. މީގެއިތުރުން، މަރިޔަމް ޝިނާ ނައީމް ދެ ލަނޑު ޖެހިއިރު، އައިޝަތު ޒީކް ބިންތި ހުސައިން ވަނީ އެއް ލަނޑު ޖަހާފައެވެ. މޫން ސްޓާއިން ލަނޑު ޖެހީ އައިޝަތު އީލާފް ސިޔާހު، އައިޝަތު އަންޖަލް ފަޒީލް، ފާތިމަތު ނާޖިހާ ޔޫފުފް، މަރިޔަމް ޒާޔާ އަލީ އަދި އައިޝަތު އީޝަލް ބިންތި ޝިފާންއެވެ.
ހޭންޑްބޯޅަ މުބާރާތުގައި މިއަދު ކުޅޭނީ ފަޔާ ސްޓާ އާއި އެމްވީޕީސް ބައްދަލުކުރާ މެޗެވެ. މި މެޗު ކާމިޔާބުކޮށް، ފައިނަލަށް ދިއުމުގެ ފުރުސަތު ފަޔާ ސްޓާއަށް ލިބޭނެއެވެ.
ފުޓްސަލް މުބާރާތުގައި މިއަދު ހަވީރު ކުޅޭނީ ރުއްގަނޑު ކިޑްސް އާއި ކްލަބް ރަންވެލިއެވެ. ރަންވެލި ވަނީ ފުރަތަމަ މެޗުގައި ނޯވާ ސްޕޯޓްސް ކްލަބް އަތުން 1-0 ގެ ނަތީޖާއަކުން ބަލިވެފައެވެ.
