ހދ. ނޭކުރަންދޫގައި ކުރިޔަށްގެންދާ އެންމެ ބޮޑު ސްޕޯޓްސް ފެސްޓިވަލް ކަމަށްވާ ”ބީސާދަ ސްޕޯޓްސް ފެސްޓިވަލް 2024“ ރަސްމީކޮށް ފަށައިފިއެވެ.
ޖުމްލަ ފަސް އިވެންޓެއް ހިމެނޭ މި ފެސްޓިވަލް ފަށާފައިވަނީ ހޮނިހިރު ދުވަހު ހަވީރުއެވެ. އެގޮތުން، ފެސްޓިވަލް ފެށުމުގެ ގޮތުން ކުރިޔަށްދިޔައީ 16 އަހަރުން ދަށުގެ ފުޓްސަލް މެޗަކެވެ.
އިއްޔެ ހަވީރު ކުޅުނު މި މުބާރާތުގެ ފުރަތަމަ މެޗުގައި ނޯވާ ސްޕޯޓްސް ކްލަބުން ވަނީ 1-0 ގެ ނަތީޖާއަކުން ކްލަބް ރަންވެލި ބަލިކޮށްފައެވެ. މި މެޗުގެ ހަމައެކަނި ލަނޑު ކާމިޔާބުކުރީ، ނޯވާގެ އަހުމަދު ނިޝާލް ނާޒިމްއެވެ. މިއާއެކު، މެޗުގެ މޮޅު ކުޅުންތެރިޔަކަށް ހޮވިފައިވަނީވެސް ނިޝާލްއެވެ.
މި މުބާރާތުގައި މިއަދު ހަވީރު ކުޅުމަށް ހަމަޖެހިފައިވަނީ ރުއްގަނޑު ކިޑްސް އާއި ފިނެމާ ފުޓްސަލް ޓީމެވެ. އަދި 16 އަހަރުން ދަށުގެ ހޭންޑްބޯޅަ މުބާރަތްވެސް މިއަދު ފަށާނެއެވެ. އެގޮތުން، މިއަދު ހަވީރު ބައްދަލުކުރާނީ ފަޔާ ސްޓާ އާއި މޫން ސްޓާއެވެ.
16 އަހަރުން ދަށުގެ ފުޓްސަލް މުބާރާތުގައި ޖުމްލަ ހަތަރު ޓީމަކުން ބައިވެރިވެފައިވާއިރު، ހޭންޑްބޯޅަ މުބާރާތުގައި ތިން ޓީމަކުން ވަނީ ބައިވެރިވެފައެވެ.
މިއަހަރުގެ ފެސްޓިވަލްގެ މެޗުތައް ޝަރަފުވެރިކުރުމަށް، ހާއްސަ އެހީއަށް ބޭނުންވާ ކުދިންނަށް ފުރުސަތު ދިނުމުގައި އިސްކަމެއް ދޭނެ ކަމަށް، ފެސްޓިވަލް އިންތިޒާމުކުރާ ޒާހިރު ސްޕޯޓްސް އެކަޑަމީ (ޒެޑް.އެސް.އޭ) އިންވަނީ ބުނެފައެވެ.
