އަނިޔާގެ ސަބަބުން ތިން މަސް ދުވަހު ކުޅުމާ ދުރުގައި ހުރުމަށްފަހު، މެންޗެސްޓާ ޔުނައިޓެޑުގެ ޑިފެންޑަރު ލޫކް ޝޯ، ފަރިތަކުރުންތަކުގައި ބައިވެރިވާން ފަށައިފިއެވެ.
ފެބުރުވަރީ މަހުގެ ފަހުން ޝޯ ޔުނައިޓެޑަށް ކުޅެފައިނުވާއިރު، މިދިޔަ އޯގަސްޓު މަހު އޭނާގެ ކުޑަކަޅުވާ މަސްގަނޑަށް ލިބުނު އަނިޔާއަކާ ގުޅިގެން އޭނާ ވަނީ ކުޅުމާ ދުރަށް ދާން ޖެހިފައެވެ.
އޮކްޓޫބަރު މަހުގެ އިންޓަނޭޝަންލ ބްރޭކަށްފަހު ޝޯއަށް ކުޅެވޭނެ ކަމަށް މީގެކުރިން ބެލެވުނުނަމަވެސް، ޔުނައިޓެޑުގެ ކުރީގެ ކޯޗު، އެރިކް ޓެން ހާގް ވަނީ ޝޯގެ އެނބުރި އައުން ލަސްވާނެކަން އިއުލާނުކޮށްފައެވެ.
މިއަހަރުގެ ފެބުރުވަރީ މަހު ޝޯގެ ފަލަމަސްގަނޑަށް ލިބުނު އަނިޔާއަކާ ގުޅިގެން އޭނާއަށް ވަނީ އެ ސީޒަނުގެ ބޮޑު ބައެއް ގެއްލިފައެވެ. މީގެކުރިންވެސް ޝޯއަށް ވަނީ އަނިޔާގެ ގިނަ މައްސަލަތައް ކުރިމަތިވެފައެވެ.
އަނިޔާގެ ސަބަބުން ސީޒަނުގެ ބައެއް ގެއްލުނުނަމަވެސް، ޔޫރޯ ފުޓުބޯޅަ މުބާރާތުގައި ވާދަކުރި އިންގްލެންޑް ގައުމީ ޓީމު ސްކޮޑުން ޝޯއަށް ވަނީ ޖާގަ ލިބިފައެވެ. މުބާރާތުގެ ގުރޫޕް ސްޓޭޖު މެޗުތައް އޭނާއަށް ގެއްލިފައިވާއިރު، ސްޕެއިން އާ ދެކޮޅަށް ކުޅުނު ފައިނަލް މެޗުގެ ފުރަތަމަ 11 ގައި އޭނާ ވަނީ ހިމަނާފައެވެ.
ޔުނައިޓެޑުގެ ވަގުތީ ކޯޗު، ވެން ނިސްޓެލްރޫއި ބުނީ، އަނިޔާގެ ސަބަބުން ކުޅުމާ ދުރުގައި ހުރި ޓައިރެލް މަލާޝިއާ، ޝޯއަށްވުރެ ކުރިން އެނބުރި އަންނާނެ ކަމަށެވެ. އޭނާގެ ކަކުލަށް އަނިޔާވެފައިވަނީ މިދިޔަ އަހަރުގެ އެޕްރީލް މަހުއެވެ.
