ޔުއެފާ ޗެމްޕިއަންސް ލީގުގައި ރޭ ޖަމާލް މުސިއާލާ ޖެހި ލަނޑާއެކު ބާސެލޯނާއިން 1-0 ގެ ނަތީޖާއަކުން ބެންފީކާގެ މައްޗަށް ކުރިހޯދައިފިއެވެ.

ބަޔާންގެ ދަނޑުގައި ރޭ ކުޅުނު މެޗުގައި ފެނުނު ހަމައެކަނި ލަނޑަކީ، 67 ވަނަ މިނެޓުގައި މުސިއާލާ ޖެހި ލަނޑެވެ. އެއީ ހެރީ ކޭން ބޮލުން ނަގައިދިން ހުރަހަކުން، މުސިއާލާ ޖެހި ލަނޑެކެވެ.

މުޅި މެޗުގައި މޮޅަށް ކުޅެ، ލަނޑު ޖަހާނެ ގިނަ ފުރުސަތު ތަނަވަސްކޮށްފައިވަނީ ބަޔާނުންނެވެ. އެގޮތުން، ފުރަތަމަ ހާފުގައި ކޭން އާއި ސާޖް ގްނަބްރީއަށް ވަނީ ރަނގަޅު ދެ ފުރުސަތެއް ލިބިފައެވެ. ނަމަވެސް، ބެންފީކާގެ ކީޕަރު ވަނީ ދެ ހަމަލާވެސް ދިފާއުކޮށްފައެވެ.

ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން ނިކުތް ލެރޯއި ސާނޭ ފޮނުވާލި ދެ ބޯޅަވެސް، ބެންފީކާގެ ކީޕަރު ވަނީ ހުށިޔާރުކަމާއެކު ދިފާއުކޮށްފައެވެ.

ޗެމްޕިއަންސް ލީގުގެ ފުރަތަމަ މެޗުގައި ޑިނަމޯ ޒެގްރެބް ކައިރިން 9-2 ގެ ނަތީޖާއަކުން ބަޔާން މޮޅުވިނަމަވެސް، ޖެހިގެން އައި ދެ މެޗުން ވަނީ ބަލިވެފައެވެ. އެގޮތުން، އެސްޓަން ވިލާ ކައިރިން ބަލިވީ 1-0 ގެ ނަތީޖާއަކުންނެވެ. އަދި ބާސެލޯނާ ކައިރިން ބަލިވީ 4-1 ގެ ނަތީޖާއަކުންނެވެ. މިއާއެކު، ބަޔާނަށް ވަނީ ތިން ޕޮއިންޓު ހޯދުން ނުހަނު މުހިންމުވެފައެވެ.

މި ނަތީޖާއާއެކު ބަޔާން ވަނީ ތާވަލުގެ 17 ވަނައަށް ޖެހިލާފައެވެ. އަދި ބެންފީކާ އޮތީ 19 ވަނައިގައެވެ.

ބަޔާން މިޔުނިކް ޗެމްޕިއަންސް ލީގު