އަންނަ ހޮނިހިރު ދުވަހު ސްޕެނިޝް ލީގުގައި ވެލެންސިއާ އާއި އެސްޕަންޔޯލް ބައްދަލުކުރަން ހަމަޖެހިފައިވާ މެޗު ފަސްކޮށްދޭން ވެލެންސިއާ އިން އެދިއްޖެއެވެ.
ވެލެންސިއާ އިން މި މެޗު ފަސްކޮށްދޭން އެދިފައިވަނީ އެ ސަރަހައްދައް މިހާރު ކުރިމަތިވެފައިވާ ފެންބޮޑުވުމުގެ ކާރިސާއާ ގުޅިގެނެވެ. އެގޮތުން، މިދިޔަ ހަފުތާއިން ފެށިގެން، އެ ސަރަހައްދުގެ މީހުން އުޅެން ޖެހުނީ މި ކާރިސާގެ ސަބަބުން ނުހަނު ބޮޑު ތަކުލީފެއްގައެވެ.
މިދިޔަ ހަފުތާގައި ވެލެންސިއާ އިން ކުޅުމަށް ހަމަޖެހިފައިވާ ދެ މެޗު ވަނީ ފަސްކޮށްފައެވެ. އެއީ ސްޕެނިޝް ކަޕުގައި ޕާލާ އެސްކުއޭލާ އާ ދެކޮޅަށް ކުޅޭ މެޗާއި، ލީގުގައި ރެއާލް މެޑްރިޑާ ދެކޮޅަށް ކުޅޭ މެޗެވެ. މި ދެ މެޗުވެސް ފަސްކުރީ ފެންބޮޑުވުމުގެ ކާރިސާއާ ގުޅިގެނެވެ. އެގޮތުން، މިހާތަނަށް ޖުމްލަ 217 މީހުން ވަނީ މަރުވެފައެވެ.
ވެލެންސިއާ އިން ނެރުނު ބަޔާނެއްގައި ބުނެފައިވަނީ، މި ކާރިސާ ހިނގަމުންދާތާ މިހާރު ހަފުތާއެއް ވެއްޖެ ކަމަށެވެ. އަދި މިވަގުތުވެސް، އެ ސަރަހައްދުގެ ހާލަތު ސީރިއަސް ކަމަށް ބުނެފައިވެއެވެ. ވެލެންސިއާ އެކޭ އެއްގޮތަށް، އަވަށްޓެރި ލެވަންޓޭ އިންވެސް ވަނީ ދެވަނަ ޑިވިޝަނުގެ މެޗު ފަސްކުރަން އެދިފައެވެ.
ރެއާލްގެ ކޯޗު ކާލޯ އަންޗެލޮޓީ އާއި އެތުލެޓިކޯ މެޑްރިޑްގެ ކޯޗު ޑިއޭގޯ ސިމިއޯނީގެ އިތުރުން ބާސެލޯނާގެ ކޯޗު ހަންސީ ފްލިކް ވަނީ، ވަގުތީ ގޮތުން ލީގު މެޗުތައް މެދުކަނޑާލަން ގޮވަލާފައެވެ.
