ސްޕެއިންގެ ވެލެންސިއާގައި ފެންބޮޑުވެ 215 އަށްވުރެ ގިނަ މީހުން މަރުވުމާ ގުޅިގެން، ފުޓުބޯޅަ މެދުކަނޑާލަން ޖެހޭ ކަމަށް ރެއާލް މެޑްރިޑުގެ ކޯޗު، ކާލޯ އަންޗެލޮޓީ ބުނެފިއެވެ.
ހޮނިހިރު ދުވަހު ކުޅުމަށް ތާވަލު ކުރެވިފައިވާ ރެއާލް އާއި ވެލެންސިއާ ބައްދަލުކުރާ މެޗާއި، ވިޔަރެއާލް އާއި ރަޔޯ ވައެކާނޯ ބައްދަލުކުރާ މެޗު ވަނީ މި ކާރިސާއާ ގުޅިގެން ފަސްކޮށްފައެވެ. ނަމަވެސް، މިހަފުތާގައި މިހާތަނަށް ސްޕެނިޝް ލީގުގެ ހަ މެޗު ވަނީ ކުޅެފައެވެ.
ފެންބޮޑުވެފައިވާ ސަރަހައްދުން ދަތުރުކުރުން މަނާކުރުމާ ގުޅިގެން، ސްޕެނިޝް ކަޕުގެ ހަ މެޗެއްވެސް ވަނީ ފަސްކޮށްފައެވެ. އަދި ކްލަބުތަކުގެ އެދުމުގެ މަތިން، ސްޕެނިޝް އެފްއޭ އިން މިއަދު ވަނީ އިތުރު ފަސް މެޗެއް ފަސްކޮށްފައެވެ.
އަންޗެލޮޓީ ބުނީ ފުޓުބޯޅަ އަކީ ”ޕާޓީ“ އެއް ކަމަށެވެ. އަދި ”ޕާޓީ“ ކުރާނީ އާއިލާ އާއި ގާތް މީހުން ސަލާމަތުން ތިބުމުން ކަމަށާއި، ސަލާމަތުން ނެތްނަމަ، ”ޕާޓީ“ ކޮށްގެން ނުވާނެ ކަމަށެވެ.
އަންޗެލޮޓީ ބުނީ، ފުޓުބޯޅަ މެޗުތައް ވަގުތީ ގޮތުން މެދުކަނޑާލަން ޖެހޭ ކަމަށެވެ. ނަމަވެސް، އޭނާ އަކީ ގޮތް ނިންމުމުގައި ހަރަކާތްތެރިވާ މީހެއް ނޫން ކަމަށާއި، އެކަމާ މެދު ގޮތް ނިންމާނީ ކަމާ ބެހޭ ފަރާތްތަކުން ކަމަށް ބުންޏެވެ.
އެތުލެޓިކޯ މެޑްރިޑްގެ ކޯޗު، ޑިއެގޯ ސިމިއޯނީ ބުނީ، އެފަދަ ކާރިސާއެއް ކުރިމަތިވެފައިވާއިރު، މެޗުތައް ކުޅުން އެއީ ”ހަމަޖެހޭ“ ކަމެއް ނޫން ކަމަށެވެ. އަދި ބާސެލޯނާގެ ކޯޗު، ހަންސީ ފްލިކް ބުނީ، އޭނާއަށް ބާރު ލިބުނުނަމަ، ހުރިހައި މެޗެއް ކެންސަލް ކުރާނެ ކަމަށެވެ.
އަންޗެލޮޓީ ބުނީ މިދިޔަ ހަފުތާ އަކީ އުނދަގޫ ހަފުތާއެއް ކަމަށެވެ. ބާސެލޯނާ ކައިރިން ބަލިވުމާއި، ބެލެންޑޯ ރަސްމިއްޔާތުގައި ކަންތައް ވީގޮތަށްވުރެ، ސްޕެއިންގެ ހާލަތު ފެނިފައި މާބޮޑަށް ހިތާމަ ކުރާކަމަށް އޭނާ ބުންޏެވެ.
ވެލެންސިއާގެ އެކި ކަންކޮޅުތަކަށް ވަނީ އެއް އަހަރު ދުވަހު ވެހޭހާ ވާރޭ ވެހި، ފެންބޮޑުވެފައެވެ.
