އިނގިރޭސި ޕްރިމިއާ ލީގުގައި ރޭ ޗެލްސީގެ ކޯލް ޕާމާއަށް ކުރި ނުރައްކާތެރި ފައުލާ ގުޅިގެން މެންޗެސްޓާ ޔުނައިޓެޑުގެ ޑިފެންޑަރު، ލިސަންޑްރޯ މާޓިނޭޒަށް ރަތް ކާޑު ދައްކަން ޖެހޭ ކަމަށް ޗެލްސީގެ ކޯޗު، އެންޒޯ މަރެސްކާ ބުނެފިއެވެ.
ޔުނައިޓެޑުގެ ދަނޑުގައި ރޭ ކުޅުނު މެޗު ނިމުނީ 1-1 ގެ ނަތީޖާއަކުން ދެ ޓީމު އެއްވަރުވެގެނެވެ. މެޗުގެ ދެވަނަ ހާފުގައި ޔުނައިޓެޑަށް ލިބުނު ޕެނަލްޓީއަކުން ބްރޫނޯ ފެނާންޑޭސް އެ ޓީމަށް ކުރިހޯދަދީފައިވަނިކޮށް، މޮއިސެސް ކައިސޭޑޯ ވަނީ ޗެލްސީއަށް ނަތީޖާ ހަމަހަމަ ކޮށްދީފައެވެ.
މެޗުގެ އިތުރު ވަގުތުގެ ތިންވަނަ މިނެޓުގައި ޕާމާއަށް ކުރި ފައުލާ ގުޅިގެން ރެފްރީ ރޮބަޓް ޖޯންސް ވަނީ މާޓިނޭޒަށް ރީންދޫ ކާޑު ދައްކާފައެވެ. މި ނުރައްކާތެރި ފައުލްގައި، މާޓިނޭޒްގެ ފައިން ޖެހުނީ ޕާމާގެ ކަކުލުގައެވެ.
ވީޑިއޯ އެސިސްޓެންޓް ރެފްރީ، މައިކަލް ސެލިސްބަރީ ވަނީ އިތުރަށް ބެލުމަށްފަހު، ޖޯންސްގެ ނިންމުން ރަނގަޅު ކަމަށް ބުނެފައެވެ. އަދި އެއީ ”ފަރުވާކުޑަ“ ފައުލެއް ކަމަށާއި، ”ސީރިއަސް“ ފައުލެއް ނޫންކަމަށް ވަނީ ނިންމާފައެވެ.
ނޫސްވެރިންނަށް މައުލޫމާތު ދެމުން މަރެސްކާ ބުނީ، އެ ފައުލާ ގުޅިގެން މާޓިނޭޒަށް ރަތް ކާޑު ދައްކަން ޖެހޭ ކަމަށެވެ. ނަމަވެސް، ރެފްރީގެ ނިންމުން އެއާ އިދިކޮޅު ކަމަށް ބުންޏެވެ. އޭނާ އިތުރަށް ބުނީ، ބޯޅައިގައި ނުޖެހި، ސީދާ ކުޅުންތެރިޔާގެ ފައިގައި ޖެހުމުން ރަތް ކާޑު ދެއްކުން ނޫންގޮތެއް ނޯންނާނެ ކަމަށެވެ.
ޔުނައިޓެޑުގެ ވަގުތީ ކޯޗު، ވެން ނިސްޓަލްރޫއި ބުނީ އެއީ ރަތް ކާޑު ދައްކަން ޖެހޭ ހާލަތެއް ނޫންކަމަށެވެ. ނަމަވެސް، މެޗަށްފަހު އަލުން އެ މަންޒަރު ނުބަލާ ކަމަށް ބުންޏެވެ.
