އިނގިރޭސި ޕްރިމިއާ ލީގުގައި މިއަދު ހަވީރު 1-0 ގެ ނަތީޖާއަކުން ނިއުކާސަލް ޔުނައިޓެޑް އަތުން ބަލިވެ، އާސެނަލްއަށް މުހިންމު ތިން ޕޮއިންޓު ގެއްލިއްޖެއެވެ.
މި މެޗަށް ނިކުތްއިރު، އާސެނަލް އޮތީ 18 ޕޮއިންޓާއެކު ތާވަލުގެ ތިންވަނައިގައެވެ. މެޗުން މޮޅުވެގެން، މެންޗެސްޓާ ސިޓީއާ ދެ ޕޮއިންޓަށް އަދި ލިވަޕޫލާ އެއް ޕޮއިންޓަށް ކައިރި ކުރުމުގެ ފުރުސަތު ލިބުނެވެ. ނަމަވެސް، މެޗުން ބަލިވުމާއެކު އާސެނަލްއަށް ވަނީ ހަތްވަނައަށް ވެއްޓުމުގެ ބިރު އުފެދިފައެވެ.
ނިއުކާސަލްގެ ދަނޑުގައި މިއަދު ކުޅުނު މެޗުގެ ހަމައެކަނި ލަނޑު، މެޗުގެ 12 ވަނަ މިނެޓުގައި އެ ޓީމަށް ކާމިޔާބުކޮށްދިނީ އެލެކްސަންޑާ އިސާކްއެވެ. އެއީ އެންތޮނީ ގޯޑަން ނަގައިދިން ހުރަހަކުން، އިސާކް ބޮލުން ޖެހި ލަނޑެކެވެ.
އާސެނަލް އިން ރަނގަޅަށް މެޗު ފެށިނަމަވެސް، ލަނޑު ޖަހާނެ ރަނގަޅު ފުރުސަތެއް ތަނަވަސްކުރެވިފައެއް ނުވެއެވެ. އަދި މެޗުގެ ކުރީކޮޅު ނިއުކާސަލް އިން ލަނޑު ޖެހުމާއެކު އާސެނަލްއަށް ވަނީ ވަރަށް ބޮޑަށް އުނދަގޫވެފައެވެ.
މިކޭލް އާޓެޓާ ވަނީ ދެވަަނަ ހާފުގެ ކުރީކޮޅު ބަދަލުތަކެއްކޮށް، ކުޅުން ރަނގަޅު ކުރުމަށް މަސައްކަތް ކޮށްފައެވެ. ނަމަވެސް، އެ ޓީމަށް ނިއުކާސަލްގެ ޑިފެންސް ފޫއަޅުވާލެވޭ ގޮތެއް ނުވިއެވެ. މުޅި މެޗުގައިވެސް އާސެނަލްއަށް ގޯލާ ދިމާލަށް ފޮނުވާލެވުނީ އެންމެ ހަމަލާއެކެވެ.
މިއާއެކު، އާސެނަލްއަށް އެންމެ ފަހުން ކުޅުނު ތިން މެޗުން ލިބިފައިވަނީ އެންމެ ޕޮއިންޓެކެވެ. އަދި ނިއުކާސަލް އިންވަނީ ފަސް މެޗަށްފަހު ފުރަތަމަ ފަހަރަށް މޮޅެއް ހޯދާފައެވެ.
