ހދ. ނޭކުރަންދޫގައި ކުރިޔަށް ގެންދިޔުމަށް ހަމަޖެހިފައިވާ ބީސާދަ ސްޕޯޓްސް ފެސްޓިވަލް 2024 ގެ 16 އަހަރުން ދަށުގެ ފުޓްސަލް އަދި ހޭންޑްބޯޅަ މުބާރާތުގެ ގުރު ނަގައިފި އެވެ.
މި މަހު 9 ވަނަ ދުވަހުން 16 ވަނަ ދުވަހުގެ ނިޔަލަށް ކުރިޔަށް ގެންދިޔުމަށް ހަމަޖެހިފައިވާ ޖޫނިއާ މުބާރާތްތަކުގެ ގުރު ނަގާފައިވަނީ މިރޭ ނޭކުރެންދޫ ކައުންސިލްގެ އިދާރާގައި ކުރިޔަށް ގެންދިޔަ ރަސްމިއްޔާތެއްގަ އެވެ.
މިއަހަރުގެ ޖޫނިއާ ފުޓްސަލް މުބާރާތުގައި ބައިވެރިވެފައިވަނީ ޖުމްލަ ހަތަރު ޓީމަކުންނެވެ. އެއީ ކްލަބް ރަންވެލި، ނޮވާ ސްޕޯޓްސް ކްލަބް، ރުއްގަނޑު ކިޑްސް އަދި ފިނެމާ ފުޓްސަލް ޓީމް އެވެ. މުބާރާތުގެ ފުރަތަމަ ބުރުގެ މެޗުތައް ކުޅުމަށް ހަމަޖެހިފައިވަނީ ލީގު އުސޫލުންނެވެ. އެގޮތުން، ލީގު ބުރުގެ އެއްވަނަ ޓީމަށް ސީދާ ފައިނަލުން ޖާގަ ލިބޭނެ އެވެ. އަދި ދެވަނަ އާއި ތިންވަނަ ލިބޭ ޓީމުގެ މެދުގައި ސެމީ ފައިނަލް މެޗެއް ކުޅެވިގެން ދާނެއެވެ.
ޖޫނިއާ ހޭންޑްބޯޅަ މުބާރާތުގައި ތިން ޓީމަކުން ވަނީ ބައިވެރިވެފަ އެވެ. އެއީ ފަޔާ ސްޓާ، މޫން ސްޓާ އަދި އެމްވީޕީސް އެވެ. މި މުބާރާތުގެވެސް ފުރަތަމަ ބުރު ކުރިޔަށްދާނީ ލީގު އުސޫލުންނެވެ. އެޔަށްފަހު، ފައިނަލްގައި ކުޅޭނީ އެއްވަނަ އަދި ދެވަނަ ޓީމެވެ.
ފުޓްސަލް މުބާރާތުގެ ފުރަތަމަ މެޗުގައި، މި މަހު ނުވަވަނަ ދުވަހު ކްލަބް ރަންވެލި ނިކުންނާނީ ނޮވާ އާ ދެކޮޅަށެވެ. އަދި ހޭންޑްބޯޅަ މުބާރާތުގެ ފުރަތަމަ މެޗުގައި މި މަހުގެ 10 ވަނަ ދުވަހު ބައްދަލުކުރާނީ ފަޔާ ސްޓާ އާއި މޫން ސްޓާ އެވެ.
މިއަހަރުގެ ފެސްޓިވަލް އިންތިޒާމުކުރަނީ ޒާހިރު ސްޕޯޓްސް އެކަޑަމީ (ޒެޑް.އެސް.އޭ) އިންނެވެ. އަދި މި ފެސްޓިވަލްގެ މީޑިއާ ޕާޓްނަރަކީ ”ޖަވިޔަނި“ އެވެ.
