އިނގިރޭސި ޕްރިމިއާ ލީގުގައި ކޯލް ޕާމާ މި ސީޒަނުގައި ކާމިޔާބުކުރި ހަތްވަނަ ލަނޑާއެކު ޗެލްސީން 2-1 ގެ ނަތީޖާއަކުން ނިއުކާސަލް ޔުނައިޓެޑް ބަލިކޮށްފި އެވެ.
ޗެލްސީގެ ދަނޑުގައި މިރޭ ކުޅުނު މެޗު ފެށިގެން 18 ވަނަ މިނެޓުގައި ޕެޑްރޯ ނެޓޯ ތަނަވަސްކޮށްދިން ފުރުސަތަކުން، ނިކޮލަސް ޖެކްސަން ވަނީ ލަނޑެއް ޖަހައި ޗެލްސީ އަށް ކުރިހޯދަދީފަ އެވެ. އެއީ މި ސީޒަނުގައި ޖެކްސަން ޖެހި ފަސްވަނަ ލަނޑެވެ.
ނިއުކާސަލް އިންވަނީ ހާފު ނިމުމުގެ ކުރިން ލަނޑެއް ޖަހައި، ނަތީޖާ ހަމަހަމަ ކޮށްފަ އެވެ. މެޗުގެ 32 ވަނަ މިނެޓުގައި އެ ޓީމަށް ލަނޑު ޖަހައިދިނީ އެލެކްސަންޑާ އިސަކް އެވެ. ހާފު ނިމެން ކައިރިވެފައިވަނިކޮށް، ޗެލްސީގެ ކްރިސްޓޮފާ އެންކުންކޫ އަށް ކުރި ފައުލަކާ ގުޅިގެން އެ ޓީމަށް ވަނީ ޕެނަލްޓީއެއް ދީފައެވެ. ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން އަންގައިގެން އިތުރަށް ބެލުމަށްފަހު، ރެފްރީ ނިންމީ ޕެނަލްޓީއެއް ނޫންކަމަށެވެ.
ދެވަނަ ހާފު ފެށިގެން ދެވަނަ މިނެޓުގައި ޕާމާ ވަނީ ލަނޑު ޖަހައި، ޗެލްސީ އަށް ދެވަނަ ފަހަރަށް ކުރިހޯދަދީފަ އެވެ. އެއީ މި ސީޒަނުގައި ކުޅުނު ނުވަ މެޗުން، ޕާމާ ޖެހި ހަތްވަނަ ލަނޑެވެ.
މި ސީޒަނުގައި ކުޅުނު ނުވަ މެޗުގެ ތެރެއިން ޗެލްސީ ވަނީ ފަސް މެޗުން މޮޅުވެފަ އެވެ. ބަލިވެފައިވަނީ ހަމައެކަނި މެންޗެސްޓ ސިޓީ އާއި ލިވަޕޫލް ކައިރިންނެވެ.
