ތައިލަންޑުގައި ކުރިއަށްދިޔަ އޭޝިއަން އޯޕަން ސްކޫލްސް އިންވިޓޭޝަނަލް (އޭ.އޯ.އެސް.އައި) ޝޯރޓްކޯސް (25މީޓަރ) އޭޖްގްރޫޕް ސްވިމިންގ ޗެމްޕިއަންޝިޕްސް 2024 ގައި އަމްނާ ތަޒްކިޔާ މިރުޞާދު، ހަތަރު އިވެންޓެއްގެ ގައުމީ ރެކޯޑް އައުކޮށްފި އެވެ.
ރާއްޖޭގެ ޒުވާން ފެތުންތެރިޔާ އައުކޮށްފައިވަނީ، އަންހެނުންގެ ޝޯޓްކޯސް 100 މީޓަރު ފްރީސްޓައިލް އިވެންޓު، އަންހެނުންގެ ޝޯޓްކޯސް 200 މީޓަރު ފްރީސްޓައިލް އިވެންޓު، އަންހެނުންގެ ޝޯޓްކޯސް 50 މީޓަރު ފްރީސްޓައިލް އިވެންޓު އަދި އަންހެނުންގެ ޝޯޓްކޯސް 200 މީޓަ އިންޑިވިޖުއަލް މެޑްލޭ އިވެންޓުގެ ޤައުމީ ރެކޯޑެވެ.
ޝޯޓްކޯސް 100 މީޓަރ ފްރީސްޓައިލް އިވެންޓުގެ ޤައުމީ ރެކޯރޑް އެންމެ ފަހުން އާކޮށްފައިވަނީ އާމިނަތު ޝަޖަން އެވެ. އެއީީ، 2014 ވަނަ އަހަރު ބޭއްވުނު ފީނާ ސްވިމިންގ ވޯލްޑް ޗެމްޕިއަންޝިޕްސް (25 މީޓަރ) ގައި 01.06.01 އިން ރޭސް ފުރިހަމަކޮށްގެންނެވެ. ތަޒްކިޔާ މިރެކޯރޑް އާކޮށްފައިވަނީ 01.03.68 އިން ރޭސް ނިންމައިގެންނެވެ.
ޝޯޓްކޯސް 200 މީޓަރު ފްރީސްޓައިލް އިވެންޓުގެ ރެކޯޑު ތަޒްކިޔާ އާކޮށްފައިވަނީ 02.20.65 އިން ރޭސް ނިންމައިގެންނެވެ. މި އިވެންޓުގެވެސް ގައުމީ ރެކޯޑް އެންމެ ފަހުން އާކޮށްފައިވަނީ އާމިނަތު ޝަޖަން އެވެ. ޝަޖަން ވަނީ 01.06.01 އިން ރޭސް ފުރިހަމަކޮށްފައެވެ.
ޝޯޓްކޯސް 50 މީޓަރު ފްރީސްޓައިލް އިވެންޓުގެ ގައުމީ ރެކޯޑް އެންމެ ފަހުން އާކޮށްފައިވަނީ މިއަހަރު މެދުތެރޭގައި ބޭއްވުނު ޔޫ.ޑަބްލިއު.އޭ ވެސްޓްކޯސްޓް ކްލަބް ނައިޓް ނަންބަރ 7 ގައި 00.28.75 އިން ރޭސް ނިންމައިގެން އައިޝަތު އުލްޔާ ޝާއިގް އެވެ. ތަޒްކިޔާ މިރެކޯޑް އާކޮށްފައިވަނީ 00.28.55 އިން ރޭސް ނިންމައިގެންނެވެ.
ޝޯޓްކޯސް 200 މީޓަރު އިންޑިވިޖުއަލް މެޑްލޭ އިވެންޓުގެ ރެކޯޑް ތަޒްކިޔާ އާކޮށްފައިވަނީ 02.42.67 އިން ރޭސް ނިންމައިގެންނެވެ. މި އިވެންޓުގެ ގައުމީ ރެކޯޑް އެންމެ ފަހުން އާކޮށްފައިވަނީ މިއަހަރު މެދުތެރޭގައި ބޭއްވުނު ރަޝްމޫރ ރޯޔަލްސް ސަމަރ (އެލް2) ޝޯރޓްކޯސް އޯޕަން މީޓް 2024 ގައި 02.45.14 އިން ރޭސް ނިންމައިގެން މިރާލް ޢައިން ލަތީފް އެވެ.
ތަޒްކިޔާ އަކީ ރާއްޖޭގައި އެންމެ ކުރިއަރަމުން އަންނަ އެއް ފެތުންތެރިޔާ އެވެ.