ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެ ވަޑައިގެންނެވުމަށްފަހު އެންމެ ފުރަތަމަ ރަސްމީ ދަތުރުފުޅެއް ކުރެއްވީ ތުރުކީއަށެވެ. މިއީ ތުރުކީގެ ރައީސް ރަޖަބް ތައްޔިބް އުރުދުޣާންގެ ދައުވަތަކަށް ރައީސް މުއިއްޒު ކުރެއްވި ދަތުރުފުޅެކެވެ. މި ދަތުރުފުޅާއެކު ތުރުކީއާއި ރާއްޖޭގެ ގުޅުމުގެ މުޅިން އާ ބާބެއް މިހާރު މިވަނީ ފެށިގެން ގޮސްފަ އެވެ. އެކުވެރި ވަރުގަދަ އަދި ރާއްޖެއަށް އެތަށް ފައިދާއެއް ލިބޭ ގާތް ގުޅުމެކެވެ.
މި ދަތުރުފުޅުގައި ރައީސް މުއިއްޒު ވަނީ ތުރުކީ ރައީސް ރަޖަބް ތައްޔިބް އުރުދުޣާންއާ ބައްދަލުކުރައްވައި، ދެ ޤައުމުގެ ގުޅުން އިތުރަށް ބަދަހިކުރެއްވުމަށް މަޝްވަރާކުރައްވާފަ އެވެ.
މި ދަތުރުފުޅުގެ އެންމެ ފާހަގަކޮށްލެވޭ އެއް ކަމަކީ ތުރުކީގައި ރާއްޖޭގެ އެމްބަސީއެއް ޤާއިމުކުރުމަށް އެއްބަސްވެވުނު ކަމެވެ. މި އެމްބަސީ ހުޅުވަން ނިންމާފައިވަނީ ތުރުކީގެ ވެރިރަށް އަންކާރާގަ އެވެ. މިއީ ރާއްޖެ އާއި ތުރުކީއާ ދެމެދުގައި އޮތް ޒަމާންވީ ސިޔާސީ ގުޅުން އިތުރަށް ހަރުދަނާކޮށް، އާ ހަރުފަތަކަށް ގެންދިއުމަށް އެޅިގެން ދިޔަ ވަރުގަދަ ފިޔަވަޅެކެވެ.
މީގެ އިތުރުން، ވިޔަފާރި، އިންވެސްޓްމަންޓް، އިޔާދަކުރަނިވި ހަކަތަ އަދި މަތީ ތަޢުލީމުގެ ދާއިރާތަކުން ގުޅުން އިތުރަށް ބަދަހިކުރުމަށް ރައީސް މުޢިއްޒު ވަނީ މަޝްވަރާ ކުރައްވާފަ އެވެ.
ދަތުރުފުޅުގެ ތެރޭގައި ”އެގްރީމަންޓް އޮން ޓްރޭޑް އެންޑް އިކޮނޮމިކް ކޯޕަރޭޝަން ބިޓްވީން ދަ ގަވަމަންޓް އޮފް ދަ ރިޕަބްލިކް އޮފް މޯލްޑިވްސް އެންޑް ދަ ގަވަމަންޓް އޮފް ދަ ރިޕަބްލިކް އޮފް ތުރްކިއޭ“ ގެ ނަމުގައި އެއްބަސްވުމެއްގައި ސޮއިކުރެވުނެވެ. މި އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ އިކޮނޮމިކް މިނިސްޓަރު މުޙައްމަދު ސަޢީދެވެ. ތުރުކީގެ ފަރާތުން، ސޮއިކުރެއްވީ ޓްރޭޑް މިނިސްޓަރު އޮމާ ބޮލަޓް އެވެ.
ރާއްޖޭގެ އިޤްތިޞާދީ ސަރަޙައްދު ބެލެހެއްޓުމަށް ތުރުކީން ޑްރޯން ގެނައުމަށްވެސް މަޝްވަރާކުރެވުނެވެ. މި މަޝްވަރާގެ ނަތީޖާއެއްގެ ގޮތުން މިހާރު ވަނީ 3 ޑްރޯން ރާއްޖެއަށް ގެނެސް އޮޕަރޭޓްކުރަން ފަށާފަ އެވެ. އަދި މިކަަމަށް ބޭނުންވާ ގިނަ އާލާތްތަކަކީ ތުރުކީން ރާއްޖެއަށް ހިލޭ ހަދިޔާ ކުރި ތަކެތިކަމަށް ރައީސް މުއިއްޒު ވަނީ ވިދާޅުވެފަ އެވެ. އަދި ދެ ގައުމުގެ ގާތް ގުޅުމުގެ ތެރެއިން ރާއްޖެއަށް އިތުރު ޑްރޯންތައްވެސް ގެންނާނެކަމަށް ރައީސް ވިދާޅުވި އެވެ.
މީގެ އިތުރުން، ވޭތުވެދިޔަ ހަފުތާގައި ރާއްޖެއާއި ތުރުކީއާ ދެމެދު މިނިވަން ވިޔަފާރީގެ އެއްބަސްވުމެއްގައި ސޮއިކުރެވުނެވެ. މި އެއްބަސްވުމުގެ ދަށުން ތުރުކީއަށް އެކްސްޕޯޓުކުރާ މަހުގެ ބާވަތްތަކަށް ލުއިތަކެއް ލިބި، ދިވެހި މަސްވެރިންނަށް ތުރުކީ މާކެޓްގައި ވިޔަފާރި ފުޅާކުރުމުގެ ފުރުޞަތު ފަހިވެގެންދާނެ އެވެ. މި އެއްބަސްވުމާއެކު ދެ ޤައުމުގެ ދެމެދު ކުރެވޭ ވިޔަފާރީގެ ހުރަސްތައް ކުޑަވެ، ވިޔަފާރީގެ ގުޅުން ވަރުގަދަވެ، ދިވެހި ވިޔަފާރިތަކަށް ތުރުކީގެ އުފެއްދުންތައް އަގުހެޔޮކޮށް ލިބުމުގެ ފުރުޞަތު ފަހިވެގެންދާނެކަމަށް ބެލެވެ އެވެ.
ރާއްޖެއާއި ތުރުކީއާ ދެމެދު ފެށުނު މި އާ ބާބުގެ ސަބަބުން ރާއްޖެއަށް އިތުރު ފައިދާތައް ވާނެކަމީ ސަރުކާރުން ޔަގީން ކުރާ ކަމެކެވެ. ރާއްޖެއާއި ތުރުކީއަކީ ފަލަސްތީނުގައި އިޒްރޭލުން ހިންގަމުން ގެންދާ ނަސްލު ނައްތާލުމުގެ އަމަލު ކުއްވެރިކޮށް އެކަމާ ދެކޮޅަށް މަސައްކަތް ކުރުމުގައި ވިސްނުން އެއްގޮތް ދެގައުމުކަންވެސް ފާހަގަކޮށްލެވެ އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރާއްޖެ - ތުރުކީ މިނިސްޓްރީ އޮފް ފޮރިން އެފެއާޒް ދިވެހިންގެރާއްޖެ365
