ދިވެހިރާއްޖޭގެ އިގްތިސޯދީ ސަރަހައްދު ދިވެހީން އަމިއްލައަށް ބެލެހެއްޓުމަކީ އަދުގެ ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާގެ ވަރަށް މުހިންމު އެއް ތަސައްވަރެވެ. މި ތަސައްވަރާ އެއްގޮތަށް އެމަނިކުފާނު ވަނީ ވެރިކަމާ ހަވާލުވެވަޑައިގެން އެންމެ ފުރަތަމަ ކުރެއްވި ރަސްމީ ދަތުރުފުޅުގައި މަސައްކަތްޕުޅު ފައްޓަވާފަ އެވެ. އެގޮތުން ތުރުކީއަށް ކުރެއްވި އެ ދަތުރުފުޅުގައި އެމަނިކުފާނު ވަނީ ރާއްޖޭގެ ކަނޑުގެ ސަރަހައްދު ބެލެހެއްޓުމަށް 3 ޑްރޯން ހޯދުމަތް މަސައްކަތްޕުޅު ކުރައްވާ އެ ޑްރޯންތައް އޮޕަރޭޓް ކުރުމަށް ދިވެހިން ސިފައިން ތުރުކީގައި ތަމްރީން ކުރުމުގެ އިންތިޒާމުތައް ހަމަޖެއްސުމަށް މަސައްކަތް ކުރައްވާފަ އެވެ.

އެ މަސައްކަތްޕުޅުގެ އެދެވޭ ނަތީޖާ މިއަހަރުގެ ތެރޭގައި ދިވެހިންނަށް ފެނިގެން ދިޔަ އެވެ. މިއަހަރުގެ މާޗް 15 ގައި ނ. މާފަރު އިންޓަނޭޝަނަލް އެއަރޕޯޓުގައި ބޭއްވި ހާއްސަ ރަސްމިއްޔާތެއްގައި ތުރުކީން ގެނައި ”ބައިރަކްތާރު ޓީބީ2“ ގެ ތިން ޑްރޯން ރައީސް މުއިއްޒު ވަނީ އިފްތިތާހުކޮށްދެއްވާފަ އެވެ. މިއާއެކު ދެން ރާއްޖޭގެ ކަނޑުގެ ސަރަޙައްދުގައި އޮޕަރޭޝަންތައް ހިންގާނީ ދިވެހި އަސްކަރިއްޔާއިން ކޯސްޓް ގާޑާ ގުޅިގެން ކަމަށް އެމްއެންޑީއެފުން ވަނީ ބުނެފަ އެވެ.

ރައީސް މުޢިއްޒު ވަނީ ދިވެހި އަސްކަރިއްޔާއިން ޑްރޯން ޓެކްނޮލޮޖީ ބޭނުންކުރުމަށްޓަކައި ގިނަ އާލާތްތައް ތުރުކީން ރާއްޖެއަށް ހަދިޔާކޮށްފައިވާ ކަމަށް ވިދާޅުވެފަ އެވެ.

މި ޑްރޯންތަކަކީ އެންމެ ޒަމާނީ އަސްކަރީ އަދި މުވާސަލާތީ އާލާތްތަކާއެކު އުފައްދާފައިވާ އުޅަނދުތަކެކެވެ. މި ޑްރޯންތަކަށް 27 ގަޑިއިރަށް ވުރެ ގިނަ އިރު 25،000 ފޫޓަށް ވުރެ މަތިން އުދުއްސޭނެ އެވެ.

މީގެ އިތުރުން ހަމަ މި ރަސްމިއްޔާތުގައި ރައީސް މުއިއްޒު ވަނީ ދިވެހި ސިފައިންގެ ތެރޭގައި ވައިގެ ސިފައިންގެ ޚިދުމަތްވެސް ފައްޓަވައިދެއްވާފަ އެވެ. ”އެމްއެންޑީއެފް އެއަރ ކޯޕްސް“ ގެ ނަމުގައި ވައިގެ ސިފައިންގެ ޚިދުމަތް އެމްއެންޑީއެފަށް ތަޢާރަފު ކޮށްދެއްވީ މި ޚާއްޞަ ރަސްމިއްޔާތުގައި ރައީސް މުޢިއްޒު ސޮއިކުރެއްވި ޤަރާރަކުންނެވެ.

މި އައު ޓެކްނޮލޮޖީ ތަޢާރަފުކުރުމާ ގުޅިގެން، ރާއްޖޭގެ ކަނޑުގެ ސަރަޙައްދު މޮނިޓަރ ކުރުމުގެ ޤާބިލުކަން އިތުރުވެ، ޤާނޫނާ ޚިލާފު މަސްވެރިކަމާއި އެހެނިހެން ކުށްތައް ހުއްޓުވުމަށް އިތުރު ބާރެއް ލިބޭނެ ކަމަށް ބެލެވެ އެވެ. މީގެ އިތުރުން، ކަނޑުގެ ސަރަޙައްދުގައި ހިނގާ އެކިއެކި ހާދިސާތަކުގައި އަވަސް އެހީތެރިކަން ފޯރުކޮށްދިނުމަށްވެސް މި ޑްރޯންތަކުގެ ބޭނުން ކުރެވޭނެ އެވެ.

ޑްރޯންގެ ހިދުމަތް ދިނުމަށް ސ. ގަމާއި ށ. ފުނަދޫގައި ވައިގެ އަސްކަރީ މަރުކަޒު އެޅުމަށްވެސް ސަރުކާރުން ވަނީ ނިންމާފަ އެވެ. އަދި އެ މަސައްކަތް މިހާރު ފަށައިގެން ކުރިއަށް އެބަ ދެ އެވެ. މި ދެ މަރުކަޒު ނިނުމާއެކު ޑްރޯންތައް އޮޕަރޭޓް ކުރާނީ އެ ދެ މަރުކަޒުންކަމަށް ސަރުކާރުން ބުނެ އެވެ. އަދި މި ދެ މަރުކަޒު ނިމުމާއެކު އިތުރު ޑްރޯންތައް ގެނައުމަށްވެސް ސަރުކާރުން އޮތީ ތައްޔާރަށެވެ.

މިއީ ރައީސް މުޢިއްޒުގެ ރިޔާސީ ވަޢުދުތަކުގެ ތެރޭގައި ހިމެނޭ، ދިވެހީންގެ ކަންކަން ދިވެހީން އަމިއްލައަށް ކުރުމަށްޓަކައި ފެއްޓުނު ވަރަށް ފުރިހަމަ މަސައްކަތެއްގެ ގޮތުގައި ފާހަގަކުރެވެ އެވެ. އަދި ރާއްޖޭގެ އިޤްތިޞާދީ ސަރަޙައްދު ރައްކާތެރިކުރުމަށް އެޅުނު މި މުހިންމު ފިޔަވަޅާ ގުޅިގެން، ގިނަ ރައްޔިތުން ވަނީ އުފާ ފާޅުކޮށްފަ އެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެމްއެންޑީއެފް ދިވެހިންގެރާއްޖެ365