އަދުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް 2023 ވަނަ އަހަރު ބޭއްވި ރިޔާސީ އިންތިހާބުގައި ގިނަ ބައެއްގެ ތާއީދު ލިބިގެން ދިޔަ ސަބަބުތަކުގެ ތެރޭގައި ރާއްޖޭގައި އެއްވެސް ގައުމެއްގެ ސިފައިން ނުބޭތިއްބުމަށް އެމަނިކުފާނު ގެންގުޅުއްވާނެކަމަށް ވައުދުވެވަޑައިގެންނެވި ސިޔާސަތަކީ މައިގަނޑު އެއް ސަބަބުކަމާ މެދު އެއްވެސް ޝައްކެއް ނެތެވެ. އޭރު އިންޑިއާ ސިފައިން ރާއްޖޭގައި ތިބިކަމަށް އެތަށް ވާހަކަތަކެއް ދިޔައީ ދެކެވެމުންނެވެ.
އެމަނިކުފާނަށް އިންތިހާބު ކާމިޔާބު ކުރެވުނު ދުވަހުން ފެށިގެން ރާއްޖޭގައި ތިބި އިންޑިއާގެ ސިފައިން އަނބުރާ އިންޑިއާއަށް ފޮނުވާލުމުގެ މަޝްވަރާތައް ފެއްޓެވި އެވެ. އެގޮތުން އިންޑިއާގެ ހައި ކޮމިޝަނާ އެމަނިކުފާނު ދިޔައީ މަޝްވަރާ ކުރައްވަމުންނެވެ. ވެރިކަމުގެ ހުވާ ކުރެއްވުމުގެ ކުރިންވެސް 2 ފަހަރެއްގެ މަތިން އިންޑިއާގެ ސަފީރާ އެމަނިކުފާނު ބައްދަލު ކުރެއްވި އެވެ.
ވެރިކަމާ ހަވާލުވެ ވަޑައިގެންނެވުމަށް ފަހުވެސް އެ ވައުދުފުޅުގެ މަތިން ރައީސް މުއިއްޒު ހަނދާން ނައްތައެއް ނުލައްވަ އެވެ. އެގޮތުން މިދިޔަ އަހަރު ޔޫއޭއީގައި ކުރިއަށް ގެންދިޔަ ކޮޕް 28 ސަމިޓްގެ ހަވާސާގައި ރައީސް ވަނީ އިންޑިއާގެ ބޮޑު ވަޒީރު ނަރެންދަ މޯދީއާ ބައްދަލު ކުރައްވާ މި މަޝްވަރާތައް ކުރިއަށް ގެންދަވާފަ އެވެ. އެއަށް ފަހު ޑިސެންބަރު 3 ވަނަ ދުވަހު ރައީސް ވަނީ ނޫސްވެރިންނާ ބައްދަލު ކުރައްވާ އިންޑިއާ ސިފައިން އަނބުރާ އިންޑިއާއަށް ފޮނުވާލުމަށް އެއްބަސްވުމަކަށް އާދެވިފައިވާކަން ހާމަ ކުރައްވާފަ އެވެ.
މި އެއްބަސްވުމުގެ ދަށުން ދެގައުމުގެ އިސްވެރިން ހިމެނޭ ކޮމިޓީއެއް އެކުލަވާލާ މަޝްވަރާތައް ފެށިގެން ދިޔަ އެވެ. އެގޮތުން ޖެނުއަރީ 14 ވަނަ ދުވަހު ބޭއްވި އެ ކޮމިޓީގެ ބައްދަލުވުމުގައި މާޗް 15 ގެ ކުރިން އިންޑިއާ ސިފައިން ރާއްޖެއިން ބޭލުމަށް މަޝްވަރާ ކުރެވިގެން ދިޔަ އެވެ. އެއަށްފަހު ޖެހިގެން އައި ފެބްރުއަރީ މަހުގެ 2 ވަނަ ދުވަހު އިންޑިއާގައި މި ކޮމިޓީން ބޭއްވި ބައްދަލުވުމުގައި ވަނީ މޭ 10 ގެ ކުރިން އިންޑިއާ ސިފައިން ބޭލުމަށް އެއްބަސްވުމަކަށް އާދެވިފަ އެވެ. މި އެއްބަސްވުމުގެ ދަށުން އިންޑީއާ ސިފައިންގެ ފުރަތަމަ ބެޗު މާޗު މަހުގެ ތެރޭގައި ފޭބުމަށް ނިންމާފައިވާ އިރު އެންމެ ފަހު ބެޗު މޭ މަހުގެ ތެރޭގައި ފޭބުމަށް ވަނީ ނިންމާފަ އެވެ.
ރާއްޖޭގައި ތިބި އިންޑިއާ ސިފައިން ކުރަމުން ދިޔަ މަސައްކަތްތައް ހުއްޓާ ނުލާ ކުރިއަށް ގެންދިއުމަށް އިންޑިއާގެ މަދަނީ މީހުން ގެނައުމަށްވެސް އޮތީ އެއްބަސްވުމަކަށް އާދެވިފަ އެވެ. އިންޑިއާ ސިފައިން ރާއްޖޭގައި ތިބީ އިންޑިއާއިން ރާއްޖެއަށް ހަދިޔާ ކުރި ޑޯނިއާ މަތިންދާ ބޯޓާއި ދެ ހެލިކޮޕްޓަރު ދުއްވުމަށެވެ. އެގޮތުން އެންމެ ފުރަތަމަ ބެޗު ފޭބުމުގެ ކުރިން ފެބްރުއަރީ 26 ވަނަ ދުވަހު ވަނީ އިންޑީއާގެ ފުރަތަމަ މަދަނީ ގްރޫޕް ރާއްޖެއަށް އައިސްފަ އެވެ.
ރާއްޖޭގައި ތިބި އިންޑިއާ ސިފައިން ރާއްޖެއިން ފޭބީ އެކި ބެޗުތަކަށް ބަހާލައިގެންނެވެ. އެގޮތުން ފުރަތަމަ ބެޗު މާޗު ކުރީ ކޮޅު ރާއްޖެއިން ފޭބި އިރު ދެވަނަ ބެޗު ރާއްޖެއިން ފޭބީ އޭޕްރިލް 9 ވަނަ ދުވަހު އެވެ. މޭ 6 ވަނަ ދުވަހާ ހަމައަށް ޖުމުލަ 51 އިންޑީއާ ސިފައިން ވަނީ ރާއްޖެއިން ފައިބައިގެން ގޮސްފަ އެވެ. އެއަށްފަހު މޭ 10 ގެ ކުރިން ރާއްޖޭގައި ތިބި ހުރިހާ އިންޑިއާ ސިފައިން ވަނީ އަނބުރާ އިންޑިއާއަށް ގޮސްފަ އެވެ.
ރާއްޖެއަކީ މިނިވަން ގައުމެއްގެ ގޮތުގައި ދެމިއޮތުމަށްޓަކައި އެހެން އެއްވެސް ގައުމެއްގެ ސިފައިން ރާއްޖޭގައި ގާއިމުވެ ތިބުމުގެ ފުރުސަތު ނުދިނުމަކީ ރައީސް މުއިއްޒުގެ މުހިންމު ސިޔާސަތެކެވެ. އެމަނިކުފާނު ވަނީ ރާއްޖޭގެ މިނިވަންކަމަށް އިހުތިރާމުކޮށް ރާއްޖޭގެ މި ނިންމުން ގަބޫލު ކުރާ ހުރިހާ ގައުމަކާއެކު ގާތް ގުޅުމެއް ބާއްވާނެކަމަށް ވިދާޅުވެފަ އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިންޑިއާގެ ބޮޑު ވަޒީރު ނަރެންދުރަ މޯދީ އިންޑިޔާ އިންޑިޔާ ސިފައިން ދިވެހިންގެރާއްޖެ365
