ދިވެހިރާއްޖެ ފަދަ ކުދި ޖަޒީރާ ގައުމުތަކަށް މޫސުމީ ބަދަލުތަކުގެ އަސަރު އެންމެ ބޮޑަށް ކުރާނެކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބައިނަލްއަގްވާމީ މަންސަތަކުގައި ތަކުރާރުކޮށް ފާހަގަކުރައްވަ އެވެ. އެމަނިކުފާނުގެ މި ވިސްނުމާއެކު، ދުނިޔެ ހޫނުވުމުގެ މައްސަލަ ހައްލުކުރުމަށް ދިވެހިރާއްޖެއިން އެޅެން ހުރި ހުރިހާ ފިޔަވަޅެއް އަޅުއްވާނެކަމުގެ އަޒުމު ބައިނަލްއަގްވާމީ މުޖުތަމައުއަށް ހާމަކުރައްވާފައިވެ އެވެ.

މި މަސައްކަތުގެ ތެރެއިން، ރައީސް މުޢިއްޒުގެ ވެރިކަމުގެ 5 އަހަރުގެ ދައުރުގައި 5 މިލިއަން ގަސް އިންދުމުގެ މަޝްރޫއު ފައްޓަވާފައިވެ އެވެ. މި މަޝްރޫއުގެ ދަށުން ރާއްޖޭގެ އެކި ކަންކޮޅުތަކުގައި އެކި ބާވަތުގެ ގަސްތައް އިންދުމަށް ރާވާފައިވެ އެވެ. އެންވަޔަރަންމަންޓް މިނިސްޓްރީން ހިއްސާކުރާ މައުލޫމާތުތަކުން އެނގޭ ގޮތުގައި، މި މަޝްރޫއު ފެށުނުތާ އެންމެ އަހަރެއްގެ ތެރޭގައި ގިނަ ބައެއްގެ އެއްބާރުލުން ލިބިފައިވާކަން ކަށަވަރުވެ އެވެ.

މީގެ އިތުރުން، މިނިސްޓަރ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ، ޠާރިޤު އިބްރާހީމް ވަނީ ފަސް މިލިއަން ގަސް އިންދުމުގެ ޕްރޮގްރާމަށް އެކި ފަރާތްތަކުން ޝައުގުވެރިކަން ފާޅުކޮށްފައިވާކަން ފާހަގަކުރައްވާފަ އެވެ. މި ކަމަކީ މި މުހިންމު މަޝްރޫއުގެ ކާމިޔާބީއަށް އުއްމީދު ބޮޑުވާ ކަމެކެވެ.

މިނިސްޓަރ ޠާރިޤު ވަނީ ސޯޝަލް މީޑިއާގައި ކުރެއްވި ޕޯސްޓެއްގައި، 5 މިލިއަން ގަސް އިންދުމުގެ މަޝްރޫއުގެ ދަށުން މިހާތަނަށް 400,000 ގަހަށްވުރެ ގިނަ ގަސް އިންދިފައިވާކަން ހާމަކުރައްވާފަ އެވެ. އަދި ކުރިއަށް އޮތް އަހަރުތަކުގައި މި މަޝްރޫއުގެ އަމާޒަށްވުރެ އިތުރަށް ގަސް އިންދައި، މި އިސްނެގުމުގެ މައިގަނޑު މަގްސަދު ހާސިލުކުރެވޭނެކަމުގެ ޔަގީންކަން ފާޅުކުރައްވާފައިވެ އެވެ.

މި މަޝްރޫއުގައި ދައުލަތުގެ ހިއްސާ އެކުލެވޭ ގިނަ ކުންފުނިތަކުން ބައިވެރިވެފައިވާކަން ފާހަގަކުރެވެ އެވެ. މީގެ ތެރޭގައި:

1. މޯލްޑިވްސް ޕޯޓްސް ލިމިޓެޑް
2. ރީޖަނަލް އެއަރޕޯޓްސް ކޮމްޕެނީ ލިމިޓެޑް
3. ސްޓޭޓް އިލެކްޓްރިކް ކޮމްޕެނީ ލިމިޓެޑް
4. މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް
5. ފަހި ދިރިއުޅުން ކޯޕަރޭޝަން
6. އުރީދޫ މޯލްޑިވްސް

މި ކުންފުނިތަކުގެ އިތުރުން، ސްޓޭޓް ޓްރޭޑިންގ އޯގަނައިޒޭޝަން ފަދަ އެހެނިހެން ކުންފުނިތަކާއެކުވެސް މި މަޝްރޫއުގައި ބައިވެރިވުމާ ގުޅޭގޮތުން އެންވަޔަރަންމަންޓް މިނިސްޓްރީން މަޝްވަރާކުރައްވާފައިވާކަން ފާހަގަކުރެވެ އެވެ. މިއީ މި މަޝްރޫއުގެ ފުޅާ ދާއިރާއާއި އޭގެ މުހިންމުކަން ދައްކުވައިދޭ ކަމެކެވެ.

ފަސް މިލިއަން ގަސް އިންދުމުގެ މަޝްރޫއަށް ބައިނަލްއަގްވާމީ އެހީތެރިކަން ލިބެމުންދާކަން އެންވަޔަރަންމަންޓް މިނިސްޓްރީން ހާމަކޮށްފައި ވެއެވެ. މިގޮތުން:

1. ޕާކިސްތާން
2. ބަންގްލަދޭޝް
3. ސަޢޫދީ ޢަރަބިއްޔާ
4. ޗައިނާ

މި ހަތަރު ގައުމުން މި މަޝްރޫއަށް އެހީތެރިވެދޭނެކަމުގެ އިޝާރާތް ލިބިފައިވާކަމަށް އެންވަޔަރަންމަންޓް މިނިސްޓްރީގެ ޑެޕިއުޓީ މިނިސްޓަރ ޙަސަން މުޙައްމަދު ވިދާޅުވެފައިވެ އެވެ. މި ގައުމުތަކުން ޓެކްނިކަލް އެހީތެރިކަމުގެ އިތުރުން ރާއްޖޭގައި އިންދުމަށް ގަހާއި އޮށް ފޯރުކޮށްދޭނެކަމަށް އެއްބަސްވެފައިވާކަމަށްވެސް އޭނާ ފާހަގަކުރައްވާފައިވެ އެވެ.

ދުނިޔޭގެ ތިމާވެށީގެ ދުވަހުގެ މުނާސަބަތުގައި ޖޫން މަހުގެ ފަސްވަނަ ދުވަހު ރައީސް ޑރ. މުހައްމަދު މުއިއްޒު ފައްޓަވައިދެއްވި ފަސް މިލިއަން ގަސް އިންދުމުގެ ޕްރޮގްރާމަކީ މުޅި ރާއްޖޭގައި ފަސް މިލިއަން ގަސް އިންދުމަށް ވެވަޑައިގަތް ރިޔާސީ މުހިއްމު ވައުދެކެވެ. މިނިސްޓްރީން ހާމަކޮށްފައިވާ ގޮތުގައި މި ޕްރޮގްރާމް ފެށުނު ފުރަތަމަ ދުވަހު ޖުމްލަ 398،000 ގަސް އިންދާފައި ވެއެވެ. މި ޕްރޮގްރާމްގެ މުހިއްމު އަމާޒަކީ ނެތިދިއުމުގެ ނުރައްކާ އޮތް ބާވަތްތައް ދިރުވައި އާލާކުރުމެވެ.

މި މަޝްރޫއުގެ ދަށުން އެންމެ ފުރަތަމަ ގަސް އިންދުމަށް ހަމަޖެހިފައިވަނީ 4 ކެޓަގަރީއެއްގެ ދަށުން ނެވެ. ގަސް އިންދުމުގައި އެންމެ ބޮޑު ސަމާލުކަމެއް ދެއްވާނީ ނެތިގެންދާ ގަސްތައް އާލާ ކުރުވުމަށް ކަން މިނިސްޓަރ ފާހަގަކުރެއްވި އެވެ. އެއަށްފަހު މޭވާ އަޅާ ގަސްތަކާއި ހިޔާ ލިބޭ ގަސްތަކާއި ބޭސްވެރިކަމަށް ބޭނުންހިފޭނެ ފަދަ ގަސްތައް އިންދުމަށް ކަނޑައަޅާފައިވާ ކަމަށް މިނިސްޓަރު މައުލޫމާތު ދެއްވި އެވެ.

މި މަޝްރޫއުގެ ދަށުން 5 އަހަރުގެ ތެރޭގައި 100 އަށްވުރެ ގިނަ ބާވަތުގެ ގަސް ރާއްޖޭގެ އެކި ސަރަހައްދުތަކުގައި އިންދުމަށް ވަނީ ރޭވިފަ އެވެ.

މި މަޝްރޫއުގައި ރަށްރަށުގެ ކައުންސިލްތަކާއި، ސްކޫލުތަކާއި، ސަރުކާރުގެ މުއައްސަސާތަކާއި އަދި އަމިއްލަ ފަރާތްތަކުންވެސް ބައިވެރިވެ، ގަސް އިންދުމުގެ މަސައްކަތުގައި ޝާމިލުވެފައިވާކަން ފާހަގަކުރެވެ އެވެ. އަދި މިހާތަނަށް ދެ ފަރާތަކުން ނާސަރީ ގާއިމުކޮށް، ގަސް މުޑުވައްކުރުމުގެ މަސައްކަތް ފަށާފައިވާކަންވެސް އެންވަޔަރަންމަންޓް މިނިސްޓްރީން ހާމަކޮށްފައިވެ އެވެ.

ފަސް މިލިއަން ގަސް އިންދުމުގެ މަޝްރޫޢު ކުރިއަށް ގެންދިއުމަށް ރޭވިފައިވާ ގޮތް.

– 2024 ވަނަ އަހަރު 500،000 ގަސް – 2025 ވަނަ އަހަރު 1،250،000 ގަސް – 2026 ވަނަ އަހަރު 1،250،000 ގަސް – 2027 ވަނަ އަހަރު 1،250،000 ގަސް – 2028 ވަނަ އަހަރު 750،000 ގަސް

ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ ފަސް މިލިއަން ގަސް އިންދުން ދިވެހިންގެރާއްޖެ365