މޭލޭގެ ހެންވޭރުގައި ހުންނަ އަލްޒައިކާ ކެފޭގައި މިއަދު ހިނގި އަލިފާނުގެ ހާދިސާގައި ބިދޭސީއެއްގެ ފައި ފިހިއްޖެ އެވެ.

އެމްއެންޑީއެފްއިން ބުނީ، މި ހާދިސާގެ ރިޕޯޓް މިއަދު 12:44 ހާއިރު އެމްއެންޑީއެފް ފަޔަރ އެންޑް ރެސްކިޔު ސަރވިސް، މާލޭ ފަޔަރ ސްޓޭޝަނަށް ލިބުމާ އެކު، އެ ފަޔަރ ސްޓޭޝަނުގެ ފަޔަރ ފައިޓަރުން ވަނީ އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކޮށްފައި ކަމަށެވެ.

އެ ގޮތުން، ފަޔަރ ފައިޓަރުން ކުރި މަސައްކަތުން އަލިފާން ނިއްވާލެވުނީ 13:00 ހާއިރު ކަމަށްވެސް އެމްއެންޑީއެފްއިން ބުނެފައިވެ އެވެ.

މި ހާދިސާއާ ގުޅިގެން ނެޝަނަލް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްއޭ) އިން ވަނީ ހަރަކާތްތެރިވެފަ އެވެ. އެންޑީއެމްއޭއިން ބުނީ، މި ހާދިސާގައި ބިދޭސީއެއްގެ ފައި ކޮންމެވެސް ވަރަކަށް ފިހުނު ނަމަވެސް އެއްވެސް މީހަކަށް އިންސާނީ އެހީ ބޭނުންވާ ހާލަތަކަށް ގޮސްފައި ނުވާ ކަމަށެވެ.

މީގެ އިތުރުން، މިއަދު މާލޭގައި އިތުރު އަލިފާނުގެ ހާދިސާއެއް ވެސް ހިނގައިފަައިވެ އެވެ. އެމްއެންޑީއެފުން ބުނީ، މ. މާމުޓާ ކިޔާ ފަޅު އިމާރާތެއްގައި ރޯވެގެން ފަތިހު 04:11 ހާއިރު ރިޕޯޓުކުރި ކަމަށެވެ. އެގޮތުން، ފަޔާ ފައިޓަރުން ކުރި މަސައްކަތުން އަލިފާން ނިއްވާލެވުނީ 04:46 ހާއިރު ކަމަށް އެމްއެންޑީއެފްއިން ބުނެފައިވެ އެވެ.

މި ހާދިސާގައި އެއްވެސް މީހަކަށް އަނިޔާއެއްވިކަމުގެ ރިޕޯޓު ލިބިފައެއް ނުވާ ކަމަށް އެމްއެންޑީއެފުން ބުނެފައިވެ އެވެ.

އެމްއެންޑީއެފް މޯލްޑިވްސް ނޭޝަނަލް ޑިޒާސްޓާރ މެނޭޖްމެންޓް އޮތޯރިޓީ (އެންޑީއެމްއޭ)