ފަލަސްތީނުގެ ހައްގުގައި ބައިނަލްއަގްވާމީ މުޖުތަމައިން އެކުގައި މަސައްކަތް ހަރުދަނާ ފިޔަވަޅުތަކެއް އަޅަން ޖެހޭ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މުއިއްޒު މިފަދައިން ވިދާޅުވީ މިއަދު ފާހަގަކުރާ ފަލަސްޠީނުގެ ރައްޔިތުންނާއެކު އެއްބައިވަންތަކަން ހާމަކުރުމުގެ ބައިނަލްއަޤްވާމީ ދުވަހާ ގުޅިގެން އެކްސްގައި ކުރެއްވި ޕޯސްޓެއްގަ އެވެ.
އެގޮތުން ރައީސް މުއިއްޒު ވިދާޅުވީ ފަލަސްތީނުގެ ހާލަތު އޮތީ ގޯސްކޮށް ކަމަށާއި ހަމަލާތައް ހުއްޓާލުމުގެ އެއްބަސްވުމެއް އޮތް ނަމަވެސް ޔަހޫދީން މެދުކެނޑުމެއް ނެތި ޣައްޒާއަށް ހަމަލާތައް ދެމުންދާކަމަށެވެ. އަދި ފަލަސްތީނުގެ ރައްޔިތުންގެ އާންމު ދިރިއުޅުމަށާއި ހަމަޖެހުން ގާއިމްކޮށް އިޤްތިސާދީ ގޮތުން ފާގަތިކަން ހޯދުމަށް ކުރާ މަސައްކަތް ހުއްޓުވުމަށް އެކި ގޮތްގޮތުން ހުރަސްތައް ކުރިމަތިކުރުވަމުންދާ ކަން ވެސް ރައީސް ފާހަގަ ކުރެއްވި އެވެ.
”ހަމައެކަނި ވާހަކަ ދެއްކުމަށް ވުރެ ބޮޑަށް ދުނިޔޭގެ އެހީތެރިކަން ފަލަސްތީނަށް ބޭނުންވޭ. އަޅުގަނޑުމެން އެބަޖެހޭ ހަގީގީ ފިޔަވަޅު އަޅަން. ފަލަސްޠީނުގެ ރައްޔިތުންނަށް އެމީހުންގެ ފުރިހަމަ ޙައްޤުތަކާއި ހުވަފެންތައް ހާސިލުކުރުމަށް އެންމެން ގުޅިގެން މަސައްކަތް ކުރަންޖެހޭ.“ ރައީސް މުއިއްޒު ވިދާޅުވެފައިވެ އެވެ.
މީގެ އިތުރުން ރައީސް ވިދާޅުވީ ރާއްޖެއިން އަބަދުވެސް ފަލަސްތީނާއެކު ދެމި ތިބޭނެ ކަމަށެވެ. އަދި ފަލަސްތީނުގައި މިނިވަން ދައުލަތެއް ގާއިމްކުރުމަށް 1967 ގެ ކުރީގެ ބޯޑަރުތަކަށް ރުޖޫއަވެ، އިރުމަތީ ގުދުސްއަކީ ވެރިރަށް ގޮތުގައި ބަލައިގަތުމަށް ވެސް ރައީސް ގެ ޕޯސްޓުގައި ގޮވާލައްވާފައިވެ އެވެ.
ހަމަލާތައް ހުއްޓާލުމަށް ވީ އެއްބަސްވުމާއި ހިލާފަށް އިޒްރޭލުން ފަލަސްތީނަށް ދެމުންދާ ހަމަލާތަކުގައި މިހާތަނަށް 347 މީހުން ވަނީ ޝަހީދުކޮށްލާފައިވެ އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރާއްޖެ - ފަލަސްތީން ފަލަސްތީން
