ސްރީލަންކާ އަށް މަސްދަޅާއި ޑޮލަރު ހަދިޔާ ކުރުމަށް ދިވެހި ސަރުކާރުން ނިންމައިފި އެވެ.
ފޮރިން މިިނިސްޓްރީން މިއަދު ބުނެފައިވަނީ، ސްރީލަންކާއަށް މިވަގުތު ކުރަމުންދާ ވިއްސާރައިގެ ސަބަބުން އެ ގައުމަށް ރާއްޖެއިން އެހީވުމަށް ނިންމާފައިވާ ކަމަށެވެ.
އެގޮތުން ރާއްޖޭން ހަދިޔާ ކުރުމަށް ނިންމާފައިވަނީ 25،000 މަސްދަޅު ކޭހާއި 50،000 ޔޫއެސް ޑޮލަރެވެ.
ފޮރިން މިނިސްޓްރީން ބުނެފަނީ ރާއްޖެއިން ލަންކާއަށް އެހީތެރިކަން ފޯރުކޮށްދިނުމަށް ނިންމީ، “ޑިޓްވާ” ތޫފާންގެ ސަބަބުން ސްރީލަންކާ ގެ އެކި ހިސާބުތަކަށް ބޯކޮށް ވާރޭވެހި އެ ޤައުމުގެ ރައްޔިތުންނަށް ލިބިފައިވާ ގެއްލުންތަކާއި ދަތިތަކުން އަރައިގަތުމަށް އެ ޤައުމަށް އެހީތެރިވުމުގެ ގޮތުން ކަމަށެވެ.
މި އެހީތެރިކަން ރަމްޒުކޮށްދެނީ ދެ ޤައުމުގެ ދެމެދުގައި އޮތް ގާތް އެކުވެރި ގުޅުމާއި މިފަދަ އުނދަގޫ ދަނޑިވަޅެއްގައި އެ ޤައުމުގެ ރައްޔިތުންނާއެކު ދިވެހި ރައްޔިތުން ތިބިއް ހާމަކޮށްދިނުމަށް ކަމަށް ފޮރިން މިނިސްޓްރީން ބުނެފައިވެ އެވެ. އަދި ރާއްޖެއިން އުއްމީދުކުރަނީ މި އެހީގެ ސަބަބުން ހާލުގައި ޖެހިފައިވާ ސްރީލަންކާ ރައްޔިތުންނަށް ކޮންމެވެސް ވަރެއްގެ ތަސައްލީއެއް ލިބި، ސްރީލަންކާ ސަރުކާރުން ކުރަމުންދާ މަސައްކަތައް ކޮންމެވެސް ވަރެއްގެ ލުއިކަމެއް ލިބޭނެކަމަށް ވެސް ފޮރިން މިނިސްޓްރީން ބުނެފައިވެ އެވެ.
ފޮރިން މިނިސްޓްރީން ބުނެފައިވަނީ މިފަދަ ކަންކަމުން ދައްކުވައިދެނީ ދެ ޤައުމުގެ ދެމެދުގައި އަދި ރައްޔިތުންގެ މެދުގައި ހިއްސާކުރާ ގާތް އެކުވެރި ގުޅުން ކަމަށެވެ.
ތޫފާން ޑީޓުވާ ގެ ސަބަބުން ސްރީ ލަންކާ އަށް ގިނަ ގެއްލުން ތަކެއް ލިބި ބިންގަނޑު ކަނޑައިގެން ދިއުމުގެ ހާދިސާތަކެއް ވެސް ހިނގާފައިވެއެވެ. މި ހާދިސާތަކުގައި އެގައުމުގެ 60 އަށް ވުރެ ގިނަ މީހުން މަރުވެ 34 މީހުން ގެއްލިފައިވާ ކަމަށް ބޭރު މީޑިއާތަކުން ރިޕޯޓުކޮށްފައިވެ އެވެ.
