ރައީސުލްޖުމްހޫރިއްޔާ ޑރ. މުހައްމަދު މުއިއްޒު، މާފަންނު ރައްޔިތުންނާ ބައްދަލު ކުރެއްވުމަށް ބާއްވާ ބައްދަލުވުމުގެ ކުރިން ރައީސް އާ ކުރަން ބޭނުންވާ ސުވާލު ފޮނުވުމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އަސްމާ ރަޝީދު ފޮނުއްވި މެސެޖުގެ މާނަ އޮޅޭ ގޮތަށް ސޯޝަލް މީޑިއާގައި ދައުރުކުރަމުންދާތީ މެންބަރު އަސްމާ އެކަން ސާފުކޮށްދެއްވައިފި އެވެ.

މެންބަރު އަސްމާ ރަޝީދު ނެރުއްވި ނޫސް ބަޔާނެއްގައި ވިދާޅުވެފައިވަނީ، ރައީސް މުޢިއްޒު ޑިސެންބަރު 4 ވާ ބުރާސްފަތި ދުވަހުގެ ރޭ 8:30 ގައި ތާޖުއްދީން ސްކޫލްގައި މާފަންނުގެ ރައްޔިތުންނާ ބައްދަލުކުރެއްވުމަށް ނިންމެވުމާއި ގުޅިގެން، ނޮވެންބަރު 26 ގައި ރައްޔިތުންނަށް ފޮނުއްވި މެސެޖުގެ މާނަ އޮޅޭ ގޮތަށް ބައެއް ފަރާތްތަކުން ސޯޝަލް މީޑިއާގައި ދައުރުކުރައްވަމުން ގެންދާ ކަމަށެވެ.

މެންބަރު އަސްމާ ވިދާޅުވެފައިވާ ގޮތުގައި، އެ މެސެޖަކީ ޖަލްސާގައި އެއްވެސް ސަބަބަކާހުރެ ރައީސުލްޖުމްހޫރިއްޔާއާ ސީދާ ސުވާލު ދެންނެވުމުގެ ފުރުޞަތު ނުލިބޭ ފަރާތްތަކުގެ ޚިޔާލާއި ކަންބޮޑުވުންތައްވެސް ރައީސްއާ ހަމައަށް ޔަޤީނުންވެސް ފޯރުކޮށްދިނުމުގެ މަޤްޞަދުގައި ފޮނުއްވި މެސެޖެކެވެ. މިއީ ދާއިރާގެ ލޮބުވެތި ރައްޔިތުންގެ ޙައްޤުގައި، އަމިއްލަ ޚައިސިއްޔަތުން ފޮނުއްވި މެސެޖެއް ކަމަށްވެސް އެ ބަޔާނުގައިވެ އެވެ.

މެންބަރު އަސްމާ ވިދާޅުވީ، މާފަންނު މެދު ދާއިރާގެ ކޮންމެ ރައްޔިތަކަށްވެސް އެ ފަރާތެއްގެ ޚިޔާލާއި ކަންބޮޑުވުމެއް ފާޅުކުރެވޭނެ ފުރުޞަތު ލިބުމަކީ ނުހަނު މުހިންމު ކަމެއް ކަމަށެވެ. އެހެންކަމުން، ރައްޔިތުންގެ މަޢުލޫމާތަށްޓަކައި މިކަން ސާފުކޮށްދެއްވަން ބޭނުންފުޅުވީ ކަމަށްވެސް ބަޔާނުގައިވެ އެވެ.

އެ ނޫސް ބަޔާނުގެ ނިންމާލައްވަމުން މެންބަރު އަސްމާ ރަޝީދު ވަނީ، އެ މެސެޖާއި ގުޅިގެން އެއްވެސް ބޭފުޅަކަށް އޮޅުމެއް އަރާފައިވާނަމަ ނިހާޔަތަށް މާފަށް އެދިވަޑައިގެންފަ އެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒު މާފަންނު މެދު ދާއިރާގެ މެންބަރު އަސްމާ ރަޝީދު