ދެކުނު އިރުމަތީ އޭޝިއާގެ ގައުމުތަކަށް ކުރިމަތިވެފައިވާ މޫސުމީ ކާރިސާތަކާއި، ހޮންގްކޮންގްގައި ހިނގި އަލިފާނުގެ ހިތާމަވެރި ހާދިސާއާ ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހިތާމަ ފާޅުކުރައްވައިފިއެވެ.
އެމަނިކުފާނު މިކަން ހާމަކުރެއްވީ މިއަދު އެކްސްގައި ކުރެއްވި ޕޯސްޓެއްގައެވެ.
ރައީސް މުއިއްޒު ވިދާޅުވީ، ތައިލެންޑް، އިންޑޮނޭޝިއާ އަދި ވިއެޓްނާމް ފަދަ ގައުމުތަކަށް ކުރިމަތިވެފައިވާ މޫސުމީ ކާރިސާތަކަކީ، މޫސުމަށް އަންނަ ބަދަލުތަކުގެ ނުރައްކާ ބޮޑުވަމުންދާ މިންވަރު ހަނދާންކޮށްދޭ ކަމެއް ކަމަށެވެ.
ރައީސް މުއިއްޒު ވަނީ ކާރިސާތަކާ ގުޅިގެން، ތައިލެންޑް، އިންޑޮނޭޝިއާ އަދި ވިއެޓްނާމްގައި ލިބުނު ގެއްލުންތަކާ މެދު ހިތާމަ ފާޅުކޮށް ކާރިސާތަކުގައި މަރުވި ފަރާތްތަކުގެ އާއިލާތަކަށް ތައުޒިޔާ ވިދާޅުވެފަ އެވެ.
މީގެ އިތުރުން، ހޮންގްކޮންގްގައި ހިނގި އަލިފާނުގެ ހާދިސާގައި ގިނަ ބަޔަކު މަރުވުމަކީ ވެސް ވަރަށް ބޮޑު ހިތާމައެއް ކަމަށް ރައީސް ވިދާޅުވި އެވެ. އެމަނިކުފާނު ވަނީ ދިވެހިރާއްޖޭގެ ރައްޔިތުންގެ ނަމުގައި، ޗައިނާގެ ރައީސް ޝީ ޖިންޕިންގ އަށާއި، ސަރުކާރަށާއި، އަދި ހާދިސާގައި ގެއްލުންވި ފަރާތްތަކުގެ އާއިލާތަކަށް ވަރަށް އިޚްލާސްތެރިކަމާއެކު ތައުޒިޔާ ފޮނުއްވާފަ އެވެ.
ރައީސް މުއިއްޒު ވިދާޅުވީ، މި ހާދިސާތަކުގެ އަސަރުކުރި ހުރިހާ ފަރާތްތަކަކާއެކު ދިވެހިރާއްޖެ ސާބިތުކަމާއެކު އެކުގައި ދެމިތިބޭނެ ކަމަށެވެ. އަދި ހާދިސާތަކުގައި އެހީތެރިކަން ފޯރުކޮށްދިނުމުގައި ހަރަކާތްތެރިވި ސަލާމަތީ ޓީމުތަކުގެ ހިތްވަރަށް އެމަނިކުފާނު ވަނީ ތައުރީފު ކުރައްވާފަ އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރާއްޖެ - ހޮންގ ކޮންގ ރާއްޖެ - ވިއެޓްނާމް ރާއްޖެ - ތައިލެންޑް ރާއްޖެ - ޗައިނާ އިންޑޮނޭޝިއާ
