ސްރީ ލަންކާއަށް ކުރަމުންދާ ބޯކޮށް ވިއްސާރައިގެ ސަބަބުން ގިނަ ބަޔަކު މަރުވެފައިވާއިރު، ނުވަރަލިޔާ ސަރަހައްދަށް ދަތުރުކުރި ދިވެހި އާއިލާއެއްގެ ޚަބަރެއް ނުވެ ގެއްލިގެން މިއަދު ހޯދަން ފަށައިފި އެވެ.
ލަންކާގައި ހުންނަ ދިވެހި އެމްބަސީގެ އޮފިޝަލަކު މައުލޫމާތު ދެއްވި ގޮތުގައި، ގެއްލިގެން ހޯދަމުންދާ ދިވެހި އާއިލާއަކީ ނުވަރަލިޔާގެ ފަރުބަދަ ސަރަހައްދަކަށް ދަތުރުކުރި ބައެކެވެ. އެމްބަސީއަށް ރިޕޯޓްކުރި ފަރާތުން ބުނެފައިވަނީ އެ އާއިލާއާ އެންމެ ފަހުން ވާހަކަދެކެވުނީ މީގެ ތިން ދުވަސް ކުރިން ކަމަށާއި، އޭގެ ފަހުން އެއްވެސް ޚަބަރެއް ވެފައި ނުވާ ކަމަށެވެ.
މި އާއިލާގައި ހިމެނެނީ ދެމަފިރިއަކާއި އެމީހުންގެ ކުޑަ ދަރިފުޅެކެވެ.
އެމްބަސީން މިހާތަނަށް ކުރި މަސައްކަތުން ވެސް އެ އާއިލާއާ ގުޅޭގޮތް ނުވެފައިވާ ކަމަށް އެމްބަސީން ވަނީ ހާމަކޮށްފަ އެވެ. މި އާއިލާ ހޯދުމަށް ދިވެހި އެމްބަސީން ދަނީ ލަންކާގެ ކަމާބެހޭ ފަރާތްތަކާއި ގުޅިގެން މަސައްކަތް ކުރަމުންކަން ކަމަށވެސްް އެމްބަސީން ބުންޏެވެ.
ލަންކާގައި މިވަގުތު 1800 އެއްހާ ދިވެހިން ދިރިއުޅެމުންދާ ކަމަށް ދިވެހި އެމްބަސީގެ މައުލޫމާތުތައް ދައްކަ އެވެ. އެ އާއިލާ ފިޔަވައި އެހެން ދިވެހިންނަށް ގެއްލުމެއް ލިބުނު ކަމުގެ ރިޕޯޓެއް މިހާތަނަށް އެމްބަސީއަށް ލިބިފައެއް ނުވެއެވެ. އެމްބަސީން ދަނީ ލަންކާގައި ދިރިއުޅޭ ދިވެހިންގެ ހާލަތު ބަލަމުންނެވެ.
މޫސުމީ މި ހާލަތާއި ގުޅިގެން އެ ޤައުމުގައި ހުންނަ ދިވެހި ހައި ކޮމިޝަނުން ވަނީ ހާއްސަ ކަންތައްތަކަށް ސަމާލުކަން ދިނުމަށް އިލްތިމާސްކޮށްފައެވެ. އެގޮތުން، ލަންކާގައި ދިރިއުޅޭ ދިވެހި ރައްޔިތުން ކޮންމެހެން ކުރަންޖެހޭ ދަތުރުތައް ނޫނީ ނުކުރުމަށް ވަނީ ވަރަށް ބޮޑަށް އިލްތިމާސްކޮށްފަ އެވެ. އޭގެއިތުރުން؛
- ގަދަވަޔާއެކު ބޯކޮށް ވާރޭވެހޭއިރު ބޭރަށް ނުދިއުން
- ލަންކާގެ މޫސުމާބެހޭ ޑިޕާޓްމަންޓާއި ކާރިސާ މެނޭޖްމެންޓް ސެންޓަރުގެ އެނެމް ފަހުގެ އިރުޝާދުތަކަށް ސަމާލުކަން ދިނުން
- އެންމެ މުހިންމު ތަކެތި—ފެން، ބޭސް، ލިޔެކިޔުން، ޗާޖުކޮށްފައިވާ މޮބައިލް ފޯނު—ތައްޔާރީ ހާލަތުގައި ބެހެއްޓުން
- ޕާސްޕޯޓާއި ދަތުރުކުރުމަށް ބޭނުންވާ އެހެނިހެން ލިޔެކިޔުންތައް ރައްކާތެރިކަމާއެކު ބެހެއްޓުން
- ކޯރު، ކައިރީގެ ސަރަޙައްދު، ކުޅި އަދި ފެން ބޮޑުވަމުންދާ ހިސާބުތަކަށް ދިއުމުގައި ސަމާލުވުން
- ފެންބޮޑުވުމުގެ ނުރައްކާ ކުޑަ ނުވަތަ ރައްކާތެރިކަން ބޮޑު ހިސާބުތަކަށް ބަދަލުވުން
އޭގެއިތުރުން ހައި ކޮމިޝަނުން ވަނީ އެ ޤައުމުގައި އުޅޭ ދިވެހިން އެއްވެސް އެހީތެރިކަމެއް ބޭނުންވެއްޖެނަމަ، ވަގުތުން ދިވެހި ހައި ކޮމިޝަންއާ ގުޅުމަށް އިލްތިމާސްކޮށްފަ އެވެ. ހައި ކޮމިޝަނާއި ގުޅުމަށް:
-
ފޯނު: +94 76 881 6666
-
އީމެއިލް: colombo.consular@foreign.gov.mv
ތޫފާން ދިތުވާގެ ސަބަބުން ސްރީ ލަންކާގައި ހިނގި ފެންބޮޑުވުމާއި ބިންގަނޑުކަނޑައިގެން ދިއުމުގެ ހާދިސާތަކުގައި މަރުވި މީހުންގެ އަދަދު މިހާރު ވަނީ 56 އަށް އަރާފަ އެވެ. އަދި ލަންކާގެ އިދާރާތަކުން ދޭ މައުލޫމާތުތަކަށް ބަލާއިރު، މި ހާދިސާތަކާ ގުޅިގެން 21 މީހަކު ގެއްލިގެން ދަނީ ހޯދަމުންނެވެ. ލަންކާގެ ގިނަ ސަރަހައްދުތަކެއްގައި މިހާރުވެސް ކުއްލި ހާލަތު އިއުލާނުކޮށްފައިވެ އެވެ.
ސްރީ ލަންކާގެ އިދާރާތަކާ ހަވާލާދީ ބީބީސީން ރިޕޯޓުކުރާ ގޮތުގައި، މި ހާދިސާގައި މަރުވި މީހުންގެ ތެރެއިން 21 މީހަކީ ސައިފަތް ހެއްދުމަށް މަޝްހޫރު ބަޑުއްލާ ޑިސްޓްރިކްޓުގެ މީހުންނެވެ. މި ޑިސްޓްރިކްޓަކީ ފެންބޮޑުވުމާއި ބިންގަނޑުކަނޑައިގެން ދިއުމުގެ ނުރައްކާ ބޮޑު ސަރަހައްދުތަކުގެ ތެރޭގައި ހިމެނޭ ތަނެކެވެ.
އެ ތޫފާން ދަތުރުކުރަމުން ދަނީ އިންޑިއާ ދިމާލަށެވެ.
