2021 ވަނަ އަހަރު ސޯޝަލް މީޑިއާގެ އެކި ވަސީލަތްތައް މެދުވެރިކޮށާއި، ފުލުހުންގެ ޚިދުމަތުގެ ތަޙްޤީޤުގައާއި، ކްރިމިނަލް ކޯޓުގެ ޝަރީޢަތުގެ މަޖިލީހުގައި ރައީސް މުޙައްމަދު ނަޝީދު މަރާލާނެކަމަށް ބުނެ އިންޒާރުދިން މީހާ 10 އަހަރަށް ޖަލަށްލުމަށް ކްރިމިނަލް ކޯޓުން ޙުކުމްކޮށްފި އެވެ.
މި މައްސަލައިގައި ޖަލު ހުކުން އައިސްފައިވަނީ ހ. ލައިޓްނައިޓް، އިސްމާޢީލް ޔާފިސްގެ މައްޗަށެވެ. މި ޙުކުމް އައީ ދައުލަތާއި އިސްމާޢީލް ޔާފިސްއާ ދެމެދު ވެފައިވާ އިޢުތިރާފުގެ އެއްބަސްވުމެއްގެ ދަށުން 26 ނޮވެންބަރު 2025 ގައެވެ.
އިސްމާޢީލް ޔާފިސްގެ މައްޗަށް ދައުލަތުން އުފުލާފައިވާ ޓެރަރިޒަމްގެ ތިން ދަޢުވާއަށް އޭނާ އިޢުތިރާފުވެފައިވާކަމަށް ކޯޓު ޙުކުމުގައިވެ އެވެ. މި އެއްބަސްވުމުގެ ދަށުން އޭނާގެ މައްޗަށް ޖުމްލަ 10 އަހަރުގެ ޖަލު ޙުކުމެއް ކަނޑައެޅުނެވެ. މި މައްސަލައަކީ 2021 ވަނަ އަހަރު ރައީސް ނަޝީދަށް އަމާޒުކޮށް ދިން އިންޒާރުތަކަކާ ގުޅިގެން ތަޙްޤީޤު ކުރެވުނު މައްސަލައެކެވެ.
އިސްމާޢީލް ޔާފިސްގެ މައްޗަށް ސާބިތުވެފައިވާ ދަޢުވާތަކާއި އެ ދަޢުވާތަކަށް ކަނޑައެޅުނު ޖަލު ޙުކުމްތައް:
- ޓެރަރިސްޓް ޖަމާޢަތަކަށް ތާއީދުކުރުން: 2 އަހަރުގެ ޖަލު ޙުކުމް.
- ޓެރަރިޒަމްގެ ޢަމަލެއް ހިންގާނެކަމުގެ އިންޒާރުދިނުން: 3 އަހަރުގެ ޖަލު ޙުކުމް
- ޓެރަރިޒަމްގެ ޢަމަލެއް ކުރުމަށް ހިތްވަރު ދިނުން: 5 އަހަރުގެ ޖަލު ޙުކުމް.
މި މައްސަލައިގައި ޔާފިސް އެންމެ ފުރަތަމަ ހައްޔަރުކޮށްފައިވަނީ ރައީސް ނަޝީދަށް އަމާޒުކޮށް ދިން ބޮމުގެ ހަމަލާއަށް ފަހު އެމަނިކުފާނު ރާއްޖޭން ބޭރުގައި ފަރުވާ ހޯއްދަވަމުން ގެންދެވި ދުވަސްވަރު އެމަނިކުފާނު އެނބުރި ރާއްޖެ ވަޑައިގެންފިނަމަ ބަދުރު ހަނގުރާމައިގެ ދުވަހު އަބޫޖަހުލަށް ހަދައިލި ގޮތް ހަދައިލާނެކަމަށް ބުނެ ރައީސް ނަޝީދަށް ސޯޝަލް މީޑިއާގައި އިންޒާރުދިނުމާއި ގުޅިގެނެވެ.
އެމައްސަލައިގައި އޭނާ ހައްޔަރުކޮށްގެން ބަންދުގެ މުއްދަތް އިތުރުކުރުމަށް ކޯޓަށް ހާޒިރުކުރުމުން، ކޯޓުގައިވެސް އޭނާ ވަނީ ރައީސް ނަޝީދަށް އިންޒާރުދީފަ އެވެ.
ރައީސް މުހައްމަދު ނަޝީދު ކްރިމިނަލް ކޯޓު ދިވެހި ފުލުހުންގެ ޚިދުމަތް ޕްރޮސެކިއުޓަ ޖެނެރަލްގެ އޮފީސް (ޕީޖީ އޮފީސް)
