ސްރީ ލަންކާ ސަރަހައްދުގައި އުފެދިފައިވާ ތޫފާނުގެ ސަބަބުން އެ ގައުމުގައި ރެޑް އެލާޓް ނެރެފައިވާ ދަނޑިވަޅުގައި ރާއްޖޭން ލަންކާއަށް ހިލޭ ގުޅޭނެ ގޮތް އުރީދޫއިން ހަމަޖައްސައިފި އެވެ.
ރާއްޖޭގައި ލަންކާގެ ގިނަ ރައްޔިތުން މަސައްކަތް ކުރަމުންދާއިރު ލަންކާގައިވެސް ގިނަ އަދަދެއްގެ ދިވެހިން ދިރިއުޅެ އެވެ. އެހެންކަމުން އުރީދޫއިން މި ނިންމުން ނިންމާފައި މިވަނީ ރާއްޖޭގައި އުޅޭ ލަންކާ ރައްޔިތުންނަށް އެމީހުންގެ އާއިލާތަކަށް ގުޅާ ހާލު ބެލުމަށް ފަސޭހަކޮށްދިނުމަށާއި ލަންކާގައި އުޅޭ ދިވެހިންގެ ހާލު ބެލުމަށް އެފަރާތްތަކުގެ އާއިލާތަކަށް ފަސޭހަކޮށްދިނުމުގެ ގޮތުންނެވެ.
ލަންކާ ސަރަހައްދުގައި އުފެދިފައިވާ ތޫފާނުގެ ސަބަބުން ސްރީލަންކާއަށް ވަނީ ބޮޑެތި ގެއްލުންތަކެއް ލިބިފަ އެވެ. މީޑިއާތަކުން ރިޕޯޓުކޮށްފައިވާ ގޮތުގައި، ވިއްސާރައިގައި ފެން ބޮޑުވުމާއި ބިންގަނޑު ކަނޑައިގެން ދިއުމުގެ ޙާދިސާތަކުގައި މިހާތަނަށް މަރުވި މީހުންގެ އަދަދު 56 އަށް ވުރެ މައްޗަށް އަރާފައިވާއިރު، ގެއްލުނު މީހުންގެ އަދަދު 100 އަށް ވުރެ މައްޗެވެ. އަދި ނުރައްކާތެރި ސަރަހައްދުތަކުން އެތަށް ހާސް ބަޔަކު ރައްކާތެރި ސަރަހައްދުތަކަށް ބަދަލުކޮށްފައިވާކަމަށް ރިޕޯޓުތައް ބުނެ އެވެ.
މި ތޫފާނުގެ ސަބަބުން ފުރާނަ ގެއްލުނު ފަރާތްތަކުގެ އާއިލާތަކަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ތައުޒިޔާ ފިނުއްވާފަ އެވެ. އެމަނިކުފާނު ތައުޒިޔާގެ މެސެޖު ފޮނުއްވާފައިވަނީ އެކްސްގައި ކުރެއްވި ޕޯސްޓެއްގަ އެވެ.
ސްރީލަންކާ ކައިރީގައި އުފެދިފައިވާ ތޫފާނުގެ ސީދާ އަސަރު ރާއްޖެއަށް ނުކުރާނެކަމަށާއި ނަމަވެސް މި ތޫފާނުގެ ސަބަބުން ރާއްޖޭގެ އެކި ހިސާބަށް ބޯކޮށް ވާރޭވެހި، ވައި ގަދަވާނެކަމަށް ލަފާކުރެވޭކަމަށް މޫސުމާ ބެހޭ ގައުމީ އިދާރާއިން ވަނީ ބުނެފަ އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރާއްޖެ - ލަންކާ އުރީދޫ މޫސުމާ ބެހޭ ގައުމީ އިދާރާ ސްރީލަންކާ
